Ukraina prezidenti Vladimir Zelenskiy BMT Xavfsizlik kengashini shoshilinch yig`ilish o`tkazishni so`radi. Bu haqda u Twitter’dagi sahifasida ma`lum qilgan.
“Men BMTdagi elchimizga Rossiyaning bugungi zarbalaridan keyin BMT Xavfsizlik Kengashining shoshilinch yig`ilishini o`tkazishni so`rashni topshirdim. Ukraina xalqaro hamjamiyatdan qat`iy javob talab qilishda davom etmoqda”, - dedi Zelenskiy.
Rossiya Federasiyasining BMTdagi vakilining birinchi o`rinbosari Dmitriy Polyanskiy Ukraina prezidentining bu bayonotiga munosabat bildirdi. Uning qayd etishicha, uchrashuv 00:00 (Moskva vaqti bilan) ga belgilangan. “Video havola orqali Zelenskiy yana Ukrainadan ma`ruzachi sifatida e`lon qilindi. Bu Xavfsizlik Kengashi ish tartibi qoidalarini buzishdir”, — deb yozdi Polyanskiy o`zining telegram-kanalida. Huquqbuzarlik deganda u onlayn ishtirok etishni nazarda tutgan.
Rossiya 24 fevraldan beri Ukrainada maxsus operasiya o`tkazmoqda. 23 noyabr kuni Rossiya yana mamlakat infratuzilmasiga zarba berdi. Shu munosabat bilan Zelenskiy BMT Xavfsizlik kengashi yig`ilishini o`tkazish tashabbusi bilan chiqdi.
