Koronavirusga chalingan bemorlar uy sharoitida qanday davolanadi? Sog`liqni saqlash vazirligi Matbuot xizmati Zangiota 1-son yuqumli kasalliklar shifoxonasi direktori Anvar Husanovning bu boradagi maslahatlarini e`lon qildi.
Mutaxassislarimizning ta`kidlashicha, hozirgi kunda koronavirus tashxisi bilan ro`yxatga olinayotgan bemorlarda kasallik avvalgi shtamlarga nisbatan birmuncha engil o`tmoqda.
— Bunday yurtdoshlarimizdan bir qismi uy sharoitida davo muolajalarini olishlari mumkin, — deydi Zangiota 1-son yuqumli kasalliklar shifoxonasi direktori Anvar Husanov. — Faqat ambulator tarzda davolanuvchi aholi qatlami hududiy oilaviy poliklinikalarda oilaviy shifokor hamda LOR mutaxassis nazoratida bo`lishlari shart.
Odatda bunday bemorlarga quyidagilar tavsiya etiladi:
- ko`proq suyuqlik ichish (sutkasiga 4-5 litr hajmda),
- tomoqni tez-tez maxsus antiseptik vositalar bilan chayish,
- virusga qarshi va antioksidant dorilar hamda D va S vitaminlari, Sink preparatlarini qabul qilish,
- ️ uy sharoitida izolyasiya va cheklovchi tartibga rioya etish,
- tibbiy niqobdan foydalanish,
- antibiotik, gormon preparatlari hamda tomchi dori vositalaridan maqsadsiz foydalanmaslik talab etiladi.
Kasallikdan qanday himolanish lozim? Bu borada mutaxassislarning tavsiyasi quyidagicha:
- avvalo, barcha aholi qatlami koronavirusga qarshi buster doza bilan emlanishi lozim;
- shaxsiy gigiena qoidalariga qat`iy amal qilish, xususan, qo`llarni yaxshilab yuvish, maxsus antiseptik vositalardan foydalanish, tomoq va burunni tez-tez chayish talab etiladi;
- yopiq binolar va jamoat joylarida tibbiy niqobdan foydalanish zarur;
- kasallikning ilk alomatlari yoki O`RVI belgilari namoyon bo`lishi bilan atrofdagilar bilan muloqotni cheklash hamda hududiy oilaviy poliklinikalarga murojaat qilish kerak;
- koronavirus aniqlangan holatda uy sharoitida turli dori preparatlari (antibiotik, gormon va tomir ichiga yuboriladigan tomchi dorilar)ni maqsadsiz qabul qilmaslik shart.