Avval xabar qilinganidek, O`zbekiston Respublikasi Kinematografiya agentligi va Ozarboyjon Respublikasi Madaniyat vazirligi tashabbusi bilan Boku shahrida o`zbek kinosi kunlari bo`lib o`tmoqda.
Ayni paytda O`zbekiston madaniy merosini asrash, o`rganish va ommalashtirish bo`yicha Butunjaxon jamiyati a`zolari ham Ozarboyjondagi kutubxonalar, muzeylar va ilmiy muassasalarida turli uchrashuvlar o`tkazishmoqda.
Butunjahon jamiyati raisi, O`zbekiston Respublikasi Kinematografiya agentligi bosh direktori Firdavs Abduxoliqov rahbarligidagi hay`at a`zolari Ozarboyjon Milliy fanlar akademiyasi Qo`lyozmalar institutida bo`lishdi.
Mazkur institutda arab, fors va turkiy tillarda minglab qo`lyozmalar saqlanmoqda. Institutda bevosita O`zbekiston madaniy merosiga daxldor qo`lyozmalar ko`rgazmasi tashkil qilindi. Ular orasida Alisher Navoiyning qator devonlar va boshqa asarlari, "Boburnoma"ning XVII asrdagi qo`lyozmasi, Ibn Sino asarlarining nodir nusxalari,Abdulloh Hotifiyning "Temurnomasm" o`rin olgan. O`zbekistonlik mehmonlar ushbu qo`lyozmalarni institut xodimlari bilan birgalikda tadqiq etish bo`yicha kelishib oldilar.
"Butunjahon jamiyati tomonidan dunyoning turli mamlakatlaridagi kutubxonalarda saqlanayotgan nodir qo`lyozmalar haqida ham o`nlab kitob- albomlar tayyorladik - dedi Firdavs Abduxoliqov. - Kelgusida ozarboyjonlik olimlar bilan ham ana shunday albom tayyorlash niyatidamiz.
Butunjahon jamiyati raisi Firdavs Abduxoliqov Qo`lyozmalar instituti rahbariga "O`zbekiston madaniy merosi dunyo to`plamlarida" turkumidan chop etilgan kitob-albomlarni topshirdi.
Butunjahon jamiyati a`zolari Ozarboyjon davlat san`at muzeyi, Haydar Aliev markazida saqlanayotgan noyob eksponatlar bilan ham yaqindan tanishdilar.