Аввал хабар қилинганидек, Ўзбекистон Республикаси Кинематография агентлиги ва Озарбойжон Республикаси Маданият вазирлиги ташаббуси билан Боку шаҳрида ўзбек киноси кунлари бўлиб ўтмоқда.
Айни пайтда Ўзбекистон маданий меросини асраш, ўрганиш ва оммалаштириш бўйича Бутунжахон жамияти аъзолари ҳам Озарбойжондаги кутубхоналар, музейлар ва илмий муассасаларида турли учрашувлар ўтказишмоқда.
Бутунжаҳон жамияти раиси, Ўзбекистон Республикаси Кинематография агентлиги бош директори Фирдавс Абдухолиқов раҳбарлигидаги ҳайъат аъзолари Озарбойжон Миллий фанлар академияси Қўлёзмалар институтида бўлишди.
Мазкур институтда араб, форс ва туркий тилларда минглаб қўлёзмалар сақланмоқда. Институтда бевосита Ўзбекистон маданий меросига дахлдор қўлёзмалар кўргазмаси ташкил қилинди. Улар орасида Алишер Навоийнинг қатор девонлар ва бошқа асарлари, "Бобурнома"нинг XVII асрдаги қўлёзмаси, Ибн Сино асарларининг нодир нусхалари,Абдуллоҳ Ҳотифийнинг "Темурномасм" ўрин олган. Ўзбекистонлик меҳмонлар ушбу қўлёзмаларни институт ходимлари билан биргаликда тадқиқ этиш бўйича келишиб олдилар.
"Бутунжаҳон жамияти томонидан дунёнинг турли мамлакатларидаги кутубхоналарда сақланаётган нодир қўлёзмалар ҳақида ҳам ўнлаб китоб- альбомлар тайёрладик - деди Фирдавс Абдухолиқов. - Келгусида озарбойжонлик олимлар билан ҳам ана шундай альбом тайёрлаш ниятидамиз.
Бутунжаҳон жамияти раиси Фирдавс Абдухолиқов Қўлёзмалар институти раҳбарига "Ўзбекистон маданий мероси дунё тўпламларида" туркумидан чоп этилган китоб-албомларни топширди.
Бутунжаҳон жамияти аъзолари Озарбойжон давлат санъат музейи, Ҳайдар Алиев марказида сақланаётган ноёб экспонатлар билан ҳам яқиндан танишдилар.
