Avval xabar qilinganidek, O`zbekiston Respublikasi Kinematografiya agentligi va Ozarbayjon Respublikasi Madaniyat vazirligi tashabbusi bilan Boku shahrida o`zbek kinosi kunlari bo`lib o`tmoqda.
Boku media markazida o`zbekistonlik va ozarbayjonlik kinoijodkorlar uchrashuvi o`tkazildi. Mazkur uchrashuvda o`zaro hamkorlikdagi loyihalarni amalga oshirish yuzasidan ham kelishuvlarga erishildi.
"Ikki mamlakat rahbarlari – Shavkat Mirziyov va Ilhom Aliyev rahbarligida mamlakatlarimiz o`rtasida turli yo`nalishlarda aloqalarimizni mustahkamlash borasida keng qamrovli ishlar olib borilyapti. Shu asosda kinematografiya sohasidagi hamkorlikni yanada rivojlantirishimiz kerak. Buning uchun esa salohiyat va imkoniyatlarimiz etarli", - dedi O`zbekiston Kinematografiya agentligi Bosh direktori Firdavs Abduxoliqov.
Ozarbayjonlik yosh kinoijodkorlar “Ipak yo`li durdonasi” Toshkent xalqaro kinofestivalida ishtirok etishganini faxr bilan yodga olishdi. Ayni paytda ozarbayjonlik kino ustalari taniqli jamoat arbobi, bokulik san`at va madaniyat homiysi, yirik sanoat xodimi Hoji Zaynulobiddin Tag`iev haqida sakkiz qismli badiiy film yaratilayotgani, filmning ma`lum qismi O`zbekiston hududida suratga olinishini ma`lum qilishdi.
Hoji Zaynulobiddin Tag`iev (1838-1924) Ozarbayjon tarixida katta mavqega ega bo`lgan tadbirkorlardan biri sanaladi. U o`z faoliyati davomida mamlakatning neft, oziq-ovqat va tekstil sanoati rivojiga katta hissa qo`shgan. Uning tashabbusi bilan Ozarbayjonning turli hududlarida o`nlab yirik ishlab chiqarish korxonalari ochilgan, minglab kishilar ish bilan ta`minlangan. Tag`iev Ozarbayjonning tashqi savdo aloqalarini mustahkamlash borasida ham katta ishlarni amalga oshirgan.
Zaynulobiddin Tag`iev o`z daromadining salmoqli qismini hayriya ishlariga, xalqning savodxonlik darajasini oshirish, ilm-ma`rifatni rivojlantirishga sarflagan. Uning moddiy va ma`naviy ko`magida mamlakatda qator ta`lim muassasalari, matbuot nashrlari tashkil qilingan.
E`tiborli tomoni Hoji Zaynulobiddin Tag`iev Markaziy Osiyo davlatlari, xususan Buxoro amirligi bilan doimiy aloqada bo`lgan. Amir Abdulahadxon, Amir Olimxon va boshqa davlat arboblari Tag`iev bilan tez-tez uchrashib, iqtisodiy sohada muzokaralar olib borishgan. Buxoro amirligi xonadoni vakillari Bokuda Tag`ievning xonadonida bir necha marotaba mehmonda bo`lishgan. Ayni paytda Tag`ievning Ozarboyjon Davlat tarixi muzeyiga aylantirilgan shaxsiy saroyida Buxoro hukmdorlarining bir qancha esdalik sovg`alari saqlanadi.
O`zbekiston delegasiyasi rahbari Firdavs Abduxoliqov Z.Tag`ievning hayoti va faoliyati bugungi yosh avlod uchun namuna bo`la olishini, uning Buxoro amirligi bilan aloqalarini chuqurroq o`rganish, kino vositasida bu boradagi ma`lumotlarni tomoshabinlarga etkazish lozimligini qayd etdi. Mazkur serialning ma`lum qismlarini O`zbekistonda suratga olinishida zarur yordam ko`rsatilishi, serialni yaratishda o`zbek san`atkorlari ham bevosita ishtirok etishi mumkinligini ta`kidladi.
Ozarbayjonlik kinoijodkorlar bu masalada hamkorlikka tayyor ekanliklarini aytib, mazkur taklif uchun samimiy minnatdorlik bildirishdi.
