“O`zbekfilm” kinokonserni” katta pavilonida Kinematografiya agentligi buyurtmasiga binoan Samarqand viloyati hokimligi bilan hamkorlikda suratga olinayotgan rejissyor Jahongir Ahmedovning “Bahodir Yalangto`sh” tarixiy-badiiy filmini tasvirga olish maydonida press-tur bo`lib o`tdi. Unda darakchi.uz muxbiri ham ishtirok etdi.
Press turda film ijodkorlari hamda “Yoshlar”, “O`zbekiston 24”, “Renessans TV”, “Madaniyat va ma`rifat”, “Kinoteatr” kabi telekanallar xodimlari va boshqa OAV vakillari ishtirok etishdi.
Yangi pavilonda kinofestival mehmonlari “Bahodir Yalangto`sh” tarixiy filmining epizodi suratga olinganiga guvoh bo`ldilar. Mehmonlar rejissyor kamerasida suratga olish jarayonlarini kuzatib, ijodiy jamoa va film aktyorlari bilan yaqindan tanishish imkoniga ega bo`ldilar.
Ma`lumot uchun, film afsonaviy Samarqand Registonining yaratuvchisi – Bahodir Yalangto`sh haqida hikoya qiladi. U Registon maydonida “Sherdor” va “Tillakori” madrasalarini bunyod etgan.
XIV Toshkent xalqaro kinofestivalida “O`zbekfilm” kinokonserni”ning yangilangan paviloni namoyish etilgan va “Bahodir Yalangto`sh” tarixiy filmini suratga olish ishlariga start berilgan edi.
– “Bir necha yil avval ushbu pavilon ayanchli ahvolda edi, kino ishlab chiqarish zamonaviy uskuna-jihozlarni talab qilar edi. Bugungi kunda davlatimiz rahbarining kinematografiyani rivojlantirishga qaratayotgan e`tibori tufayli rekonstruksiya qilinib, jahon andozalari darajasida filmlar suratga olish imkonini beruvchi uskunalar bilan jihozlandi. Tarixiy filmlar yaratilishi bu muhim jarayondir. O`z navbatida biz kinoijodkorlar ham o`zbek millatining zabardast vakillari, tarixiy va o`chmas siymolari haqida kinokartinalar suratga olishimiz lozim. Bir necha yillardan buyon o`zbek kinematografiyasida ham tarixiy filmlar olinishiga urg`u berilayapti. Aynan “Bahodir Yalangto`sh” filmi esa oldingi filmlarimizdan farqli o`laroq yangicha zamonaviy pavilionda, shu bilan birga eng so`nggi rusumdagi kameralarda tasvirga tushirilmoqda. Bu esa filmning yanada sifatli va tomoshabop bo`lishiga o`z hissasini qo`shmasdan qolmaydi”, — deydi “O`zbekfilm” kinokonserni” direktori Bahodir Odilov.
Yangi panoramali pavilon eng yuqori zamonaviy badiiy va texnologik saviyada filmlar suratga olishga ixtisoslashgan. Agar ilgari yirik blokbasterlar va jangovar filmlar xromakey yordamida suratga olingan bo`lsa, bugun Stage Craft texnologiyasidan foydalanish bilan hammasi global miqyosda o`zgaradi. Texnologiya bitta pavilonning o`zida yuqori sifatli tasvirni olish imkonini beradi. Qimmatbaho dekorasiyalar o`rniga sahnaning orqa fonida kerakli atmosferani to`liq etkazib bera oladigan yirik choksiz LED panellar o`rnatildi.
Film postonovkachi rejissyori Jahongir Ahmedov, ssenariy mualliflari Xasan Toshxo`jaev, Jahongir Ahmedov hamkorligida yaratilayapti. Bosh rollarni Bekzod Muhamadkarimov, Matyoqub Matchonov, Boyir Xolmirzaev ijro etayapti.
“Bahodir Yalanto`sh – milliy qahramonimiz. Endi, uning sharofati bilan, butun dunyo Registon maydonining go`zalligi va ulug`vorligidan bahramand bo`ladi. XV asrda Mirzo Ulug`bek tomonidan qurdirilgan madrasa yonida, oradan ikki asr o`tib, uning buyrug`iga asosan ikkita – Sherdor va Tillakori madrasalari qad rostlagan. Afsuski, Bahodir Yalanto`sh haqida kam ma`lumotga egamiz va O`zbekiston Prezidentining shaxsiy topshirig`iga binoan yaratilayotgan film, me`moriy merosimiz qanday yaratilganini odamlarga, ayniqsa, yoshlarga so`zlab berishga qaratilgan.
Nega aynan ushbu qahramon haqida film olyapmiz? Nazarimda, barcha taniydigan qahramonlarimiz bilan bir qatorda tarixda o`chmas iz qoldirgan, ammo nomi ko`p ham tilga olinmaydigan Bahodir Yalangto`sh kabi shaxslar haqida film qilish maqsadga muvofiqdir. Ushbu film shaxsan muhtaram prezidentimiz Shavkat Mirziyoev tashabbusi bilan suratga olinmoqda. Eng so`nggi texnologiyalar bilan ishlayotganimiz ham quvonarli va o`z o`rnida mas`uliyatlidir. O`ylaymanki, tomoshabinlar uchun yaxshi saviyadagi film yaratamiz”, — deydi film rejissyori Jahongir Ahmedov.
