Oliy ta`lim, fan va innovasiyalar vaziri Ibrohim Abdurahmonov rahbarligida davlat oliy ta`lim muassasalarining faoliyat samaradorligini baholash, tahlil qilish va oshirish chora-tadbirlari hamda ustuvor vazifalarni belgilash bo`yicha kengaytirilgan yig`ilish o`tkazildi. Bu haqda vazirlik matbuot xizmati xabar bermoqda.
Vazir yig`ilish boshida OTM rahbarlarini vazirlikning yangi tuzilmasi, tizim tashkilotlari, rahbar va mutasaddi xodimlar bilan tanishtirdi.
Shundan so`ng har bir oliy o`quv yurti o`z axloq kodeksini ishlab chiqishi, bu kodeksda oliy ta`lim muassasasining o`ziga xos jihatlari, talablar, pedagoglar va bitiruvchilarning maqomi, sha`ni, majburiyat va mas`uliyatlarini aks ettirish lozimligi qayd etildi. Har bir OTM talabalarning ma`naviy jihatdan barkamol bo`lishlari uchun adabiyot, san`at, musiqa va qo`shiqchilikning turli yo`nalishlaridan birortasidan foydalanishi, buni imij darajasiga chiqarishlari tavsiya etildi.
Vazir, shuningdek OTMdagi muammoli yoshlar va iqtidorli talabalarga alohida sharoit yaratilishi, ularni rag`batlantirish mexanizmlarini ishlab chiqish lozimligi haqida fikr bildirdi. Har bir talaba tarbiyasi bilan individual shug`ullanish, uyushmagan qatlam va iqtidorli talabalar bilan muntazam muloqot mexanizmini ishlab chiqish va yo`lga qo`yish, rag`batlantirish masalalari muhokama qilindi. Iqtidorli talabalarni xorijiy universitetlarga qisqa muddatli stajirovkalarga jo`natish an`anasini tizimli yo`lga qo`yish lozimligi aytib o`tildi.
Shu bilan bir qatorda, rektorlar mavqeini ko`tarish masalasiga to`xtalib, har bir rektor o`z akademik faolligini oshirishi, o`z yo`nalishida original dastur tuzib, talabalarga ma`ruzalar o`qishi, xorijda monografiyalar chop etishi lozim, dedi I.Abdurahmonov.
Nafaqat rektor, balki professorning ham o`ziga xos ma`ruzalar turkumi bo`lishi va uni universitet brendiga aylantirish bo`yicha tizimli ishlar qilinishi kerakligi aytildi. Har bir professorning ikkitadan – ta`lim va ilmiy ishlar bo`yicha yordamchisi (esearch assistant va teaching assistant) bo`lishi, ular ma`ruzalar sifatini oshirishga ko`mak berish bilan birga, talabalar tomonidan ma`ruzalarni o`zlashtirish darajasini ham nazoratga oladi. Ular talabalar bilan alohida ishlab, mavzu bo`yicha savollarini ma`ruzachiga etkazib berishda ko`prik bo`lib xizmat qiladi.
Professional ta`lim muassasalaridagi ta`lim sifatini oshirish maqsadida ta`lim jarayoniga doktorantlarni biriktirish, muassasalarning moddiy-texnik bazasini takomillashtirishga ham alohida urg`u berildi.
Iqtidorli talabalar, yosh pedagoglar va doktorantlarni etakchi xorijiy ta`lim muassasalariga tahsil olish va tajriba orttirishga yuborishga qaratilgan dasturlar ishlab chiqilishi, bunda shu paytgacha yosh olimlar uchun tashkil etilgan «English for Science» platformasidan foydalanish va uni keng targ`ib qilish kerakligi qayd etildi.
Shuningdek, OTM ilmiy kengashlari faoliyatini yanada jadallashtirish masalasi o`rtaga tashlanib, olimlarning nufuzli xorijiy nashrlarda maqolalarini chop etishda «Proofreading» xizmatidan foydalanish maqsadga muvofiq ekani aytildi.
Rektorlar o`zlari rahbarlik qilayotgan OTMning moliyaviy masalalariga ham shaxsan javobgar bo`lishlari haqida ogohlantirildi. Talabalarga turar joylarni tashkil etish, ularni muqobil energiya manbalaridan foydalanishini ta`minlash, keyingi o`quv yili uchun o`quv va yotoqxona binolarining shayligiga alohida e`tibor qaratish lozimligi ta`kidlandi.
