O`zbekiston amaliy san`at muzeyida “O`zbekiston madaniy merosi jahon to`lamlarida” turkumidagi 30 jildlik kitob va albomlar ko`rgazmasi bo`lib o`tdi. Mazkur tematik ko`rgazma O`zbekistonning barcha hududlaridagi an`anaviy o`zbek liboslariga bag`ishlangan bo`lib, uning namunalari jahon muzeylari va shaxsiy to`plamlarda saqlanadi.
Shuningdek, “O`zbekiston madaniy merosi jahon to`plamlarida” turkumidagi nashrlarning “O`zbekiston muzeylari va shaxsiy kolleksiyalar materiallari asosidagi an`anaviy o`zbek liboslari” nomli ikki jildining taqdimoti bo`lib o`tdi. Unda tarixiy ma`lumotlar va bizgacha etib kelgan kiyimlar namunalari asosida yaratilgan o`zbek xalqining milliy liboslari boy milliy merosi namoyish etilgan. Bu nashrlarda asosiy e`tibor liboslarning mintaqaviy xususiyatlarini ochib berishga qaratilgan. Birinchi qism Buxoro, Samarqand, Toshkent va Farg`ona vodiysida kiyiladigan erkaklar va ayollar kiyimlariga bag`ishlanadi. Ikkinchi qismda esa Surxondaryo, Qashqadaryo, Xorazm va Qoraqalpog`iston milliy kiyimlari haqida so`z boradi.
“Milliy libos-milliylik ramzi” tadbiri doirasida O`zbekiston madaniy merosini o`rganish, saqlash va ommalashtirish bo`yicha Butunjahon jamiyati olimlari tomonidan yaratilgan kitob-albomlar ko`rgazmasi va taqdimoti o`tkazildi. Amaliy san`at muzeyi, Yakkasaroy tumani ayollar va qizlar bilan ishlash bo`limi, O`zbekiston Bosh prokuraturasi, Toshkent to`qimachilik engil sanoat instituti, “Osiyo Ramzi” dizaynerlar uyushmasi uning tashkilotchilaridir.
Barcha viloyatlardan milliy kiyim namunalari – Toshkent va Farg`ona, Surxondaryo va Qashqadaryo aholisiga oid ayollar choponlari ko`rgazmasi, yorqin liboslar va taqinchoqlar hamda boshqa mavzuli ko`rgazmalar namoyish etildi.
Ishtirokchilar o`tgan tadbir yuzasidan o`z fikr va taassurotlari bilan o`rtoqlashdilar.
O`zbekiston Bosh prokurori o`rinbosari Svetlana Ortiqova:
- Bugun ko`rgazmada ko`rgan kitoblarimiz aql bovar qilmaydigan darajada ajoyib asarlardir. Ularni takror va takror o`qishimiz, ular bilan ongimizni boyitishimiz kerak. Biz betakror liboslarimiz orqali madaniy merosimizni asrab-avaylaymiz va ko`paytiramiz, yoshlarda milliy urf-odat va an`analarimizga mehr uyg`otamiz.
Xolida Komilova, O`zbekiston “Osiyo Ramzi” dizaynerlar uyushmasi raisi, Toshkent to`qimachilik va engil sanoat instituti prorektori, fan doktori:
- Butun dunyodagi O`zbekiston san`atini o`ziga jamlagan ajoyib kitoblar bular! Bugun ularni ko`rish, his qilish, o`qish uchun, Germaniyada qanday namunalar saqlanishini bilish uchun, AQSh kolleksiyalarida taqdim etilgan liboslarni ko`rib, qoyil qolish uchun ajoyib imkoniyat yaratildi.
Ko`pgina san`atshunos va olimlarning fikricha, bu juda yaxshi natijalarga, yuqori sifat va jiddiy ilmiy yondashuvlarga ega bo`lgan ajoyib loyiha. Men bu kitoblarni muzeyda eksponat sifatida qoldirishni va bir oy davomida bu erga talabalar hamda maktab o`quvchilarini jalb qilishni taklif qildim.
Elmira Gul, O`zbekiston Respublikasi Fanlar akademiyasi San`atshunoslik instituti etakchi ilmiy xodimi, san`at fanlari doktori, professor:
– “O`zbekiston madaniy merosi jahon to`plamlarida” loyihasining 7 yillik faoliyati davomida 60 jildlik kitob-albomlar yaratildi. Ayni paytda 61 va 62 jildlar ustida ish olib borilmoqda. Ko`pgina nashrlarimizda an`anaviy kiyim va zargarlik buyumlari mavjud. Ish va izlanish jarayonida milliy liboslarimiz namunalari qanchadan-qancha xorijiy va shaxsiy kolleksiyalarda saqlanayotganidan xabardor bo`ldik va hayratga tushdik. Va ushbu loyiha tufayli bu to`plamlar mavjud. Kitoblarimiz madaniyatimizning xorijdagi elchilaridir. Va eng muhimi, bu meros zamonaviy urfdagi liboslar rivojlanishining asosidir.
Tursunali Qo`ziev, Madaniy meros agentligi direktorining birinchi o`rinbosari:
– Madaniyat va san`at yo`nalishida o`tkaziladigan barcha tadbirlarda bu kitoblar namoyish etilishi kerak, deb o`ylayman. Bugun taqdimoti bo`lib o`tgan bu ikki jild, aslida, O`zbekiston milliy liboslarining birinchi ensiklopediyasidir.
Ismat Yusupov, Amaliy san`at muzeyi direktori:
– Avvalo, bugungi tadbirga mezbonlik qilgan tashkilotchilarga, bizga merosimiz bilan tanishish uchun ajoyib kitoblarni taqdim etgan O`zbekiston madaniy merosini o`rganish, saqlash va ommalashtirish bo`yicha Butunjahon jamiyatiga o`z minnatdorchiligimni bildiraman. Bu jildlarning har biri ortida ko`plab olimlarning ulkan mehnatiyotibdi. Ushbu ko`rgazma muhim voqealar muhitiniyanada to`ldirdi. Va agar ular bo`lmaganda, tadbir bunchalik qiziqarli bo`lmasdi.
