Isroil arxeologlari bundan ikki ming besh yuz yil avvalgi qadimiy Fors shahrini topdilar. Bu haqda Isroil qadimiy ashyolar boshqarmasi ma`lumotiga tayanib, Xinhua agentligi xabar qildi.
Qayd etilishicha, Isroilning shimolida O`rta er dengizi sohilidagi hozirgi Nagariya shahri hududida olib borilgan qazishmalar natijasida binolar va ko`chalar, savdo va sanoat hududlari, diniy maqbaralar va yirik omborlar aniqlandi.
Arxeologlarning fikriga ko`ra, uzoq mamlakatlardan qadimgi dengizchilar - finikiyaliklar tomonidan olib kelingan keramika idishlar, ko`zalar, amforalar va boshqa narsalar topilgan.
O`sha davrda Fors imperiyasi bilan Qadimgi Yunoniston o`rtasidagi munosabatlar keskinlashgan bo`lsa-da, shahar aholisi O`rta er dengizining sharqiy qismida dengiz savdosining markazida turgan finikiyaliklar orqali Yunoniston bilan savdo aloqalarini ushlab turgan.
