Toshkent viloyati IIBB JQB xodimlari tomonida o`tkazilgan navbatdagi nazorat tadbirda savdosi cheklangan 2 ming dona dori vositalarini O`zbekistonga olib kirgan Qozog`iston fuqarosi daliliy ashyo bilan ushlandi.
Toshkent viloyati IIBB Giyohvandlik va psixotrop moddalarning noqonuniy muomalasiga qarshi kurashish bo`limi, hamkor tashkilotlar tomonidan viloyatning Zangiota tumanida navbatdagi nazorat-reyd tezkor tadbiri o`tkazildi. Bu haqda IIBB Axborot xizmati xabar bermoqda.
Tadbirda 1989 y.t. fuqaro G.D. (ayol)ning yashash xonadoni xolislar ishtirokida ko`zdan kechirilgan. Natijada uy ichi va hovlidagi avtomashinada qora bozordagi narxi 200 mln so`mga teng bo`lgan 15 xil nom va ko`rinishdagi 36 ming 696 dona kuchli ta`sir qiluvchi dori vositalari sotish maqsadida saqlab kelinayotgani aniqlanib, dorilar daliliy ashyo sifatida olindi.
Shundan so`ng, tezkor tadbir davom ettirilib, bu ayolga dori vositalarini etkazib berayotgan ta`minotchi ham O`zbekiston hududiga “tovar” bilan kirgan vaqtida IIBB xodimlari tomonidan qo`lga olindi.
Aniqlanishicha, 1989 y.t. E.O`. (Qozog`iston Respublikasi fuqarosi) 2 ming quti yoki 72 ming dona tarkibida kuchli ta`sir qiluvchi modda bo`lgan (O`zbekistonda savdosi tartibga solingan) dorilarni yashirin ravish davlat chegarasidan olib o`tgan.
Hozirda mazkur holat yuzasidan Jinoyat kodeksining 251-moddasi (kuchli ta`sir qiluvchi yoki zaharli moddalarni qonunga xilof ravishda muomalaga kiritish) 3-qismi bilan jinoyat ishi qo`zg`atilib, tergov harakatlari o`tkazilmoqda.
Bir so`z bilan aytganda, tezkor tadbir davomida 20 xilga yaqin turli nom va ko`rinishdagi, jami 108 ming 696 dona tarkibida kuchli ta`sir qiluvchi modda yoki ularning analoglari bo`lgan dorilarning muomalaga kiritilishing oldi olindi.
