Surxondaryo viloyati prokuraturasi ijtimoiy tarmoqlarda Termiz shahrida bir nafar bola kaltaklanganligi bilan bog`liq tarqalgan xabar yuzasidan rasmiy bayonot berdi.
Aniqlanishicha, 2023 yilning 6 aprel kuni kuni soat 16:30 larda Termiz shahri, "Alpomish" mahallasida joylashgan motamsaro ona haykali yonida voyaga etmagan X.E. yaxshi ko`rgan qizini voyaga etmagan M.J. bilan birga yurganini ko`rib qolib, jamiyatda yurish-turish qoidalarini qasddan mensimasdan M.J. ni urib tan jarohati etkazgan.
Respublika Sud tibbiy ekspertiza ilmiy amaliy markazi Surxondaryo viloyat filialining dastlabki ma`lumotnomasiga ko`ra, M.J.ning burun devorlarini ikki tomonlama sinishi kabi tan jarohati olganligi aniqlangan.
Mazkur holat yuzasidan 10.04.2023 yil Termiz shahar IIB huzuridagi Tergov bo`limi tomonidan O`zbekiston Respublikasi JKning 277-moddasi 1-qismi bilan jinoyat ishi qo`zg`atilib, dastlabki tergov harakatlari olib borilmoqda.
Jinoyat ishining tergovi Termiz shahar prokuraturasi tomonidan nazoratga olingan.
