Toshkentda ichida 11 kishi bo`lgan lift pastga tezlik bilan tushib ketgani haqida xabar bergan edik.
Sanoat xavfsizligi davlat qo`mitasi holat yuzasidan o`rganish ishlari natijasini e`lon qildi.
Unga ko`ra, holat sodir bo`lgan Yangihayot tumani, “Yangi Darxon” MFYda joylashgan 17-sonli 16 qavatli uy 2023 yil aprel oyida foydalanishga topshirilgan. Mazkur holatni birlamchi o`rganish davrida ko`p qavatli uyda Turkiya korxonasi tomonidan 2022 yilda ishlab chiqarilgan, yuk ko`tarish quvvati 1 000 kg bo`lgan lift 16-qavatdan 1-qavatga harakatga kelgach, tezlikni nazorat qiluvchi, ya`ni to`xtash lozim bo`lgan etajga yaqinlashganda lift kabinasini sekinlatuvchi (datchik zamedleniya) qurilmasi nosozligi sababli tezlik kamaymagani va 1-qavatga yaqinlashganda liftning avtomatik tormoz tizimi ishga tushib to`xtagani hamda tezlik kamaymagani tufayli shaxtada o`rnatilgan bufer qismiga kelib urilgani taxmin qilindi.
Lift to`xtagandan so`ng mazkur mavzedagi ko`p qavatli uylarga xizmat ko`rsatuvchi injenering kompaniyasi “Premium Promotion” MChJning liftlarga xizmat ko`rsatuvchi mutaxassislari tomonidan eshikni ochib liftdan taxminan 11 kishini chiqarib olgan, bulardan 3 kishi turli xil sinishlar bilan shifoxonaga yotqizilgan.
Hozirda, Tog`-kon, geologiya va sanoat xavfsizligini nazorat qilish inspeksiyasi mutaxassislari tomonidan mazkur mavzedagi “dom”larga xizmat ko`rsatuvchi injenering kompaniyasi “Premium Promotion” MChJning rahbariyati tomonidan mazkur mavzedagi barcha liftlarni qayta navbatdan tashqari texnik ko`rikdan o`tkazish va liftlarning tezligini nazorat qiluvchi, ya`ni sekinlatuvchi (datchik zamedleniya) qurilmalarini qayta ko`rikdan o`tkazish ishlari amalga oshirilmoqda.
Shuningdek, inspeksiya mutaxassislari tomonidan Toshkent shahri va viloyatlardagi ko`p qavatli uylarda o`rnatilgan lift qurilmalarni texnik ko`rikdan o`tkazish ishlari boshlangan.
