Ijtimoiy tarmoqlarda Surxondaryo viloyatining Bandixon tumani prokurori Soatmurod Mahmanov hududdagi mahalla raislarini haqorat qilgani, tilga olib bo`lmas so`zlar bilan “siylagani”ning audiosi tarqaldi.
Mazkur audiodan anglashilishicha, prokuror tumandagi MFY raislarini yig`ib, soliq tushumlari bo`yicha hisobot so`ragan.
“Erkakmisan sen ham? Xotinchalish, itdan tarqalgan ekansan-da, bo`lmasa odamning ishini qilarding-da. Bor, borib itga o`xshab vovulla ko`chada”, — deydi prokuror soliq tushumlarini eplolmagan raisga yuzlanar ekan.
Audioda prokuror bilan muloqot qilgan MFY raislari orasida ayol raislar ham borligi eshitiladi.
“O`lsang, bugun ko`mar edik”, — deydi prokuror yana bir raisni koyir ekan.
Prokuror yonida ko`rinib turgan raislarning biriga “Itdan tarqaganmisan, odamdan tarqaganmisan?”, — deya savol beradi. Hamda “itvachcha”, deya haqorat qiladi.
2023 yil 20 iyun kuni ijtimoiy tarmoqlarda Bandixon tumani prokurori S.Maxmanovga tegishliligi ta`kidlanib, tarqatilgan audioyozuvlarning haqqoniyligi, qachon, qaerda va qanday holatlarda yuz berganligi hamda boshqa holatlar Surxondaryo viloyati prokuraturasi tomonidan o`rganilmoqda.
