Rossiyada bo`lib o`tgan Fojiali voqealar bo`yicha davlat rahbarining matbuot kotibi Dmitriy Peskov "Vagner" asoschisi Evgeniy Prigojinga nisbatan jinoiy ish to`xtatilishini, u "Belarusga ketganini" va isyon bilan bog`liq vaziyat Ukrainaga qarshi jangning borishiga ta`sir qilmasligini aytdi.
Peskovning ma`lum qilishicha, kecha ertalab Rossiya va Belarus prezidentlari o`rtasida bo`lib o`tgan suhbatda Lukashenko vaziyatni hal qilish uchun vositachilik sa`y-harakatlarini amalga oshirishini bildirgan.
"Aleksandr Grigorevich Prigojin bilan uzoq vaqtdan beri, taxminan 20 yildan buyon tanish. Bu uning shaxsiy tashabbusi bo`lgan taklif edi. Bu sa`y-harakatlari uchun Belarus prezidentidan minnatdormiz”, - deydi Peskov.
Uning so`zlariga ko`ra, ikki prezident Prigojin bilan kelishuv shartlari haqida vaziyatni "keyinchalik yo`qotishlarsiz", "kuchlanish darajasini oshirmasdan" hal qilish kerakligi xususida gaplashishgan. Natijada, Vagner" o`z lagerlariga qaytishi to`g`risida kelishuvga erishilgan. Xohlaganlar, kelajakda Rossiya Mudofaa vazirligi bilan shartnoma imzolashlari mumkin.
Ma`lum qilinishicha, "Vagner" jangchilariga, ularning frontdagi xizmatlarini hisobga olgan holda ta`qib qilinmaydi. Kreml ularga bo`lgan bu hurmatni doimo saqlab qolishini bildirgan. Vositachilik harakatlaridan maqsad qon to`kilishiga, ichki qarama-qarshiliklarga, to`qnashuvlarga yo`l qo`ymaslik bo`lgan.
Qayd etilishicha, Prigojinga nisbatan jinoiy ish to`xtatiladi va uning o`zi Belarusga ketadi. U Belarusda nima qilishi, hozir qaerdaligini Kreml bilmaydi.
Ta`kidlanishicha bu holatlar Rossiyaning Ukrainada olib borayotgan janglardagi jarayonlarga ta`sir qilmaydi.
Peskov Mudofaa vazirligidagi kadrlar o`zgarishi prezidentning Oliy Bosh qo`mondon sifatidagi mutlaq vakolati bo`lgani uchun muzokaralar chog`ida bu mavzu ko`tarilmaganligini aytgan.
Shuningdek, Matbuot kotibi Putin tomonidan yangi murojaatlar qilish rejalashtirilmaganligini, kecha davlat rahbari Kremlda bo`lganligini qayd etgan.
