O`zbekiston Respublikasi Prezidenti Shavkat Mirziyoevning Evropada xavfsizlik va hamkorlik tashkiloti Demokratik institutlar va inson huquqlari bo`yicha byurosi (EXHT DIIHB) missiyasi rahbari Ursula Gachek bilan 3 iyul kuni bo`lib o`tgan uchrashuvida bo`lajak prezidentlik sayloviga tayyorgarlik ko`rish va uni o`tkazish masalalari ko`rib chiqildi.
Davlatimiz rahbari EXHT bilan konstruktiv muloqot, faol almashinuvlar, ochiq va samarali hamkorlik yo`lga qo`yilganini katta mamnuniyat bilan qayd etdi.
Byuro ekspertlari milliy saylov tizimini modernizasiya qilishda, shu jumladan mamlakatimiz Saylov kodeksini ishlab chiqishda ishtirok etgan.
EXHT DIIHB missiyasi joriy yil 30 aprel kuni bo`lib o`tgan Konstitusiya bo`yicha referendumni kuzatishda ham qatnashgan edi.
Uchrashuvda umumxalq ovoz berish jarayonini xalqaro standartlarga muvofiq o`tkazishning turli jihatlari yuzasidan atroflicha fikr almashildi.
DIIHB missiyasi rahbari Ursula Gachek Yangi O`zbekistondagi ortga qaytmas demokratik yangilanishlar va ijtimoiy-iqtisodiy islohotlarni yanada chuqurlashtirish jarayonlarini qo`llab-quvvatladi. Mamlakatimizda shaffof va adolatli saylov o`tkazish borasida ko`rilayotgan chora-tadbirlar qayd etildi.
