Ijtimoiy tarmoqlarda bolani itlar galasi tishlagani haqida xabarlar tarqaldi. Andijon viloyati Sog`liqni saqlash boshqarmasi holat haqida rasmiy ma`lumot berdi.
Ma`lum qilinishicha, 2023 yil 9 iyul kuni Xo`jaobod tumanining "Mustaqillikning 30 yilligi" mahallasida bir necha itlar galasi xolasining yashash xonadoniga mehmonga kelgan, Paxtaobod tumani Qorashox MFY Yangi cheklarda yashovchi 17.10.2018 yilda tug`ilgan, voyaga etmagan fuqaro B. Ya, ushbu mahallada tashkil etilgan, aholi yashash hududidan uzoqda joylashgan chiqindi tashlash joyiga yaqin hududda qarovsiz holatda o`ynayotgan vaqtda itlar B. Ya ni tishlab olganligi natijasida bir necha joyidan tan jarohat olgan.
Viloyat markazidagi shifoxonada davolanayotgan bolaning umumiy ahvoli nisbatan qoniqarli, hushida, o`zi mustaqil ovqatlanmoqda, harakatlanmoqda.
Bolada o`ng yuzi, ikkala quloq suprasi, chap o`mrov sohasi, ko`krak qafasi orqa yuzasi, ikkala elka, dumg`aza sohasida it tishlagan jarohatlari bor, davolanish jarayonlari viloyat sog`liqni saqlash boshqarmasi boshlig`i va tibbiy markaz direktori nazoratiga olingan, bolada quturish alomatlari yo`q.
Eslatib o`tamiz, joriy yil 8 iyul kuni Samarqand shahrining Nabiev-4 ko`chasida ham itlar galasi yosh bolaga hujum qilgan edi. Keyinroq, bolaga tashlangan itlarning egasiga nisbatan O`zbekiston Respublikasi Ma`muriy javobgarlik to`g`risidagi kodeksning 110-moddasi (It va mushuk boqish qoidalarini buzish) bilan ma`muriy bayonnoma rasmiylashtirildi.
