Ekstremistik mazmundagi materiallarni tarqatgani uchun Interpol kanallari orqali qidiruvga berilgan jinoyatchi Koreyadan O`zbekistonga deportasiya qilindi. Bu haqda Interpolning O`zbekiston Respublikasidagi Milliy markaziy byurosi xabar qilmoqda.
Ma`lum qilinishicha, Interpolning Toshkent va Seuldagi MMBlari hamkorligida olib borgan harakatlar tufayli xalqaro qidiruvda bo`lgan jinoyatchini deportasiya qilish masalasi hal etildi.
Ikki davlatning o`zaro axborot almashinuvi va hamkorlikdagi tezkor-qidiruv harakatlari natijasida, shuningdek, O`zbekistonning Janubiy Koreyada akkreditasiyadan o`tgan diplomatik missiya xodimlarining bevosita ko`magida hamda Interpolning Toshkent va Seuldagi MMBlarining uchrashuvlar chog`idagi avvalgi kelishuvlari asosida ekstremistik mavzudagi materiallarni tarqatishda ayblanayotgan xalqaro darajadagi qidiruvda bo`lgan jinoyatchini topshirish tadbiri amalga oshirildi.
Qidiruvdagi shaxs chet el davlatining telefon raqamidan foydalanib, yangi profil yaratgan, turli ijtimoiy tarmoqlar orqali O`zbekistonda taqiqlangan diniy-ekstremistik tashkilotlar, g`oyalar va audiomateriallarni tarqatgan.
O`zbekistonning Janubiy Koreyadagi elchixonasi xodimlari hamda Interpolning Toshkent va Seuldagi MMBlari hamkorligida amalga oshirilgan tezkor harakatlar natijasida jinoyatchi O`zbekiston huquq-tartibot idoralariga topshirish uchun chiqarib yuborildi.
