Ozarbayjonning Shusha shahrida bo`lib o`tayotgan 40-TURKSOY doimiy Kengashining yig`ilishi doirasidagi navbatdagi muhokamada qator masalalar ko`rib chiqildi.
Dastlab, TURKSOY xalqaro tashkilotining 2023 yil davomida amalga oshirilgan ishlari yuzasidan hisoboti tinglandi. Shundan so`ng, “TURKSOY nazari” loyihasi ko`rib chiqilib, shu asosda kelgusida turkiy dunyo madaniyatini rivojlantirishga qaratilgan vazifalar va tashkilotda ish hajmining oshayotgani, hamkorlik doirasining kengayayotgani hisobga olinib, tuzilma tarkibini kengaytirish masalasi atroflicha muhokama qilindi.
Shuningdek, kelgusi o`n yillikka mo`ljallangan “Yoshlar strategiyasi” doirasida TURKSOYga a`zo davlatlar ijodkor yoshlarini har tomonlama qo`llab-quvvatlashga qaratilgan loyihalar yuzasidan fikr-mulohaza va takliflar almashildi. Bundan tashqari, 2025-yildan boshlab “Turkiy dunyo madaniyati poytaxti” maqomini alifbo bo`yicha berish masalasi ko`rib chiqilib, bir ovozdan ma`qullandi. E`tiborlisi, turkiy dunyo davlatlari o`rtasida tarixiy shaxslarni xotirlash, xususan, joriy yilda Abdulla Qodiriy tavalludining 130 yilligini keng nishonlashga oid tadbirlar rejasi belgilandi.
Shu bilan birga turkiy xalqlarning moddiy va nomoddiy madaniy merosi ro`yxatini tuzish bo`yicha ishchi komissiya tashkil qilishga kelishib olindi.
Shuning bilan ikki kun davomida TURKSOYga a`zo mamlakatlar madaniyat vakillari ishtirokidagi muhokamalar o`z nihoyasiga etdi.
