Poytaxtda o`tayotgan Iqtisodiy hamkorlik tashkiloti sammiti tadbirlari doirasida 9 noyabr kuni O`zbekiston Respublikasi Prezidenti Shavkat Mirziyoevning Eron Islom Respublikasi Prezidenti Ibrohim Raisiy bilan uchrashuvi bo`lib o`tdi. Bu haqda Prezident matbuot xizmati xabar qildi.
O`zbekiston-Eron munosabatlarini yanada mustahkamlash, savdo, investisiyalar, innovasiyalar va transport sohalarida amaliy hamkorlikni kengaytirish masalalari muhokama qilindi.
O`zaro muloqotlar faol davom etayotgani mamnuniyat bilan qayd etildi.
Ikki tomonlama savdoda o`sish sur`ati saqlanib qolmoqda, iqtisodiyotning turli tarmoqlarida kooperasiya loyihalari birgalikda amalga oshirilmoqda.
Ilgari oliy darajada erishilgan kelishuvlarni to`liq ro`yobga chiqarish masalalariga alohida e`tibor qaratildi.
Sanoat kooperasiyasi va mahalliylashtirish, qishloq xo`jaligi, logistikada o`zaro manfaatli hamkorlikni kengaytirish uchun imkoniyatlar mavjudligi ta`kidlandi.
O`zbekiston va Eron rahbarlari madaniy-gumanitar va ilm-fan sohasidagi almashinuvlarni rivojlantirish muhimligini ko`rsatib o`tdilar.
Shuningdek, mintaqaviy ahamiyatga molik masalalar, shu jumladan Afg`onistondagi bugungi vaziyat nuqtai nazaridan ko`rib chiqildi.
