Prezident ayrim vazirliklarga berilgan er va binolar kadastri qoniqarsizligi haqida gapirdi

Suv havzalarini, kanal va kollektor atrofidagi bo`sh erlarni aholi va tadbirkorlarga berish bo`yicha qaror qabul qilingan.

Lekin, er balansida suv fondi erlarining bor-yo`g`i 0,3 foizi ekin eri sifatida ko`rsatilgan. Bu haqiqiy ahvoldan yiroqligi, zero suv xo`jaligida erlarning aksariyatida egalik hujjati mavjud emasligi ko`rsatib o`tildi.

Aslida, suv fondi erlaridan qo`shimcha iqtisodiy samara olishning birdan bir yo`li – ularni to`liq kadastrdan o`tkazish. Bu ish o`rniga ham, oziq-ovqat uchun ham qo`shimcha zaxira bo`ladi. 

Mutasaddilarga suv fondi erlarini tartibga solish bo`yicha tegishli topshiriqlar berildi. 

Hokimlarga suv fondi kadastri qachon to`liq bo`ladi, deb kutib o`tirmasdan, hujjati tayyor bo`lgan bo`sh erlarni aholiga eksportbop ekin ekish uchun bo`lib berish topshirildi.

Shuningdek, yig`ilishda yo`l xo`jaligida ham shu ahvol ekani ta`kidlandi. Ko`pgina ichki yo`llar va unga tutash erlarning hujjati yo`qligi bilan bog`liq muammolar ko`rsatib o`tildi. 

Kelgusi yilda “Tashabbusli byudjet” va “Mening yo`lim” loyihalariga ajratiladigan mablag`lar hisobidan ta`mirlanadigan ichki yo`llarni loyihalashda ularga kadastr hujjatini tayyorlashni ham nazarda tutish topshirildi.

Ayrim vazirliklarga berilgan er va binolar kadastri ham qoniqarsizligi qayd etildi. Ba`zi ob`ektlarning egalik hujjati yo`qligi aniqlangan. Ushbu erlarning hujjati yo`qligi sababli talon-toroj qilingan holatlar mavjud.

Vazirliklarga o`zlariga qarashli barcha er va binolarni hujjatlashtirishni yakuniga etkazish, Bosh prokuraturaga ushbu ishlarning qat`iy nazoratini yo`lga qo`yish topshirildi.