Qozog`iston Favqulodda vaziyatlar vazirligi xodimlari sel bilan bog`liq vaziyat tufayli aholi punktlaridan 11 mingdan ortiq odamni evakuasiya qildi. Bu haqda Qozog`iston hukumati matbuot xizmati ma`lum qildi.
“Favqulodda vaziyat zonalaridan jami 11 306 kishi evakuasiya qilindi, 5 456 kishi vaqtinchalik joylashtirish markazlarida bo`lib turibdi”, — deyiladi xabarda.
Suv yuvib ketgan yo`llar, ko`prik va aholi punktlarida ta`mirlash ishlari olib borilmoqda.
“Transport aloqasi bo`lmagan aholi punktlari bilan aloqa o`rnatildi, hokimliklar tomonidan zarur oziq-ovqat va dori-darmon vositalari taqdim qilindi. Favqulodda vaziyatlar zonalarida aholiga tun-u kun yordam ko`rsatilmoqda. Ishga 2 mingdan ortiq texnika, jumladan, suv nasoslari, qayiqlar va samolyotlar jalb qilingan”, — deyiladi matbuot xizmati xabarida.
Ayni paytda bir qator suv omborlari tranzit rejimida ishlamoqda, faol suv chiqarish ishlari olib borilmoqda.
Suv toshqinlari oqibatida vayron bo`lgan uy-joylarni tiklash va qurish uchun hukumat va mahalliy ijro etuvchi hokimiyat organlarining zaxiralaridan mablag`lar ajratiladi.
“Hozirdan tabiiy ofat etkazgan zarar miqdorini aniqlashni boshlash va jabrlanganlarga zudlik bilan moddiy yordam ko`rsatishni, shuningdek, kelajakda bunday yirik suv toshqinlarining oldini olish bo`yicha kompleks chora-tadbirlar ishlab chiqish zarur”, — dedi bosh vazir Oljas Bektenov.
Qozog`iston Favqulodda vaziyatlar vazirligi ma`lumotlariga ko`ra, Aqto`be, Ko`stanay, G`arbiy Qozog`iston, Abay, Ulitau va Aqmola viloyatlarining bir qancha hududlarida keng ko`lamli suv toshqinlari tufayli favqulodda vaziyatlar e`lon qilingan.
