So`nggi oylarda to`qimachilik mahsulotlarimiz 3 ta yangi bozorga chiqdi, eksport geografiyasi 83 ta davlatga kengaydi. Bu haqda Prezident matbuot kotibi xabar berdi.
Biroq hanuzgacha eksportning qariyb 80 foizi Rossiya, Xitoy va Turkiya bozorlariga to`g`ri kelayotgani ta`kidlandi. Shuningdek, Evropaga eksportni ko`paytirish dolzarb ahamiyatga ega.
“Evropa, Amerika va boshqa rivojlangan davlatlar bozoriga yoki brendlarga eksport hajmini oshirish uchun korxonadan xalqaro standart va sertifikat talab etiladi. Lekin, eksportchilarimizning 12 foizigina bunday talablarga javob beradi”, – dedi Prezident.
Viloyat hokimlari investisiya bo`yicha o`rinbosarlarining bu boradagi faoliyati sustligi, eksportchilarga ko`maklashishga e`tiborsizligi tanqid qilindi.
Yirik korxonalarning mahallalarda filiallarini tashkil qilish amaliyotini kengaytirish zarurligi qayd etildi.
Chunki korxona boshqa hududda filial ochsa, ortiqcha vaqt va xarajat qilib, yangidan standart joriy qilishi yoki sertifikat olishi shart emas.
O`z faoliyatini yiriklashtirgan korxonalar bilan ishlashda Soliq qo`mitasi huzuridagi Yirik soliq to`lovchilar inspeksiyasi faoliyatini takomillashtirish zarurligi ko`rsatib o`tildi.
Bundan buyon Inspeksiya faqat yirik strategik tarmoqlarga mas`ul bo`lishi taklif qilindi.
To`qimachilik korxonalari uchun eng katta masalalardan biri bu – xom ashyo.
Yurtimizda 1 million 300 ming tonna tolani qayta ishlash quvvati bor. Keyingi 2 yilda yangi loyihalar hisobiga ushbu quvvatlar 1,5 million tonnaga etadi. Lekin hozirda 1 million tonnaga yaqin tola ishlab chiqarilmoqda.
Bunday sharoitda yakkayu-yagona yo`l – paxta etishtirish tannarxini kamaytirish va hosildorlikni oshirish shartligi ta`kidlandi.
Bundan buyon viloyatda qayta ishlashni birinchi va ikkinchi zanjiri bor to`qimachilik korxonasi paxta xom ashyosini fermerdan bozor narxida sotib olish imkoniyatiga ega bo`ladi va o`z vaqtida yakuniy hisob-kitobni amalga oshiradi.
