Tadbirkorlarni qo`llab-quvvatlash orqali yangi ish o`rinlari yaratish davlatimiz rahbarining qat`iy topshirig`i va bugungi kunning o`tkir talabidir. Prezident Xalq qabulxonasi ayni shu topshiriq ijrosi bo`yicha o`ziga biriktirilgan Jizzax viloyati tumanlarida ish olib borib, qisqa muddatda murojaatchilar bandligi ta`minlanmoqda.
Xususan, Prezident Xalq qabulxonasi hisobidan Baxmal tumanida istiqomat qiluvchi 80 nafar xotin-qizga tikuv mashinalari va pishiriq pishirish pechlari olib berildi. Bu esa Prezident virtual qabulxonasiga asosan moddiy yordam masalasida murojaat qilgan shu ayollarning ishlab daromad topishi, biri ikki, ro`zg`ori but bo`lishi uchun yana bir qo`shimcha imkoniyatdir.
Tikuv mashinali bo`lgan 75 nafar ayollar baxmallik 22 tadbirkor bilan kichik kooperasiyalar tashkil qilib, ish boshladi. 22 tadbirkorning barchasi tikuvchilik sohasida boy tajribaga, etarlicha salohiyat-u barqaror ish hajmiga, eng muhimi o`z bozoriga ega.
Zulayho Yo`ldosheva to`rt yildan beri Baxmalning Navro`z qishlog`idan Toshkent bozorlariga kiyim-kechak etkazib beradi. Buyurtmasi kundan kun ko`payib borayotgan bu oilaviy korxona bilan shu qishloqlik yana 9 nafar tikuvchi kooperasiya tashkil qilgach, sexning ishchilari soni 22 nafarga etdi.
Xuddi shunday kamida besh yillik tajribaga ega baxmallik Marhabo Nazarova va Mehriniso Rahmonova kabi yosh tadbirkorlar ham 3-4 nafardan yangi chevarlarni yoniga olib, faoliyatini yanada kengaytirdi. Ularning aytishicha, ishlagan chevar Baxmalning shu chekka qishlog`ida turib ham oyiga 3-4 million so`m bemalol daromad qila oladi.
Prezident Xalq qabulxonasining aholi qo`shimcha daromad qilishi uchun sharoit-u imkoniyat yaratishga oid navbatdagi loyihasi lokasiyasi bizni ikki karra og`ir cho`l hudud bo`lmish Arnasoyga etakladi. Maqsad – oqar suv taqchil mahalda tomorqalardagi ekinlarni saqlab qolish uchun sizot suvlaridan foydalanishni tashkil qilishdan iborat. Buning uchun tez orada og`ir sharoitdagi 500 ta xonadon tomorqasida ichki imkoniyatlar hisobidan quduq qaziladi. Ichishga yaroqsiz bu sizot suvlariga mahalliy o`g`it aralashtirilib, asosan yoz chillasida ekinlarni sug`orish mumkin. “Chinobod” mahallasida yashovchi O`lmasjon Xudoyberdiev bir necha yildirki shu usuldan foydalanib, daromad qiladi.
Tuman sektorlari rahbarlari bu borada yana bir tashabbus bilan chiqishdi: “Zarafshon” mahallasida tajriba tariqasida ichki imkoniyatlar hisobilan tomorqalarga 7 tonnalik rezervuarlar o`rnatilyapti. Agar bu tajriba amalda o`zini oqlasa, keyingi bosqichda arnasoylik yana 150 ta xonadon o`z tomorqasida zaxira sug`orish mexanizmiga ega bo`ladi.
“G`afur G`ulom” mahallasida yashovchi Olim Shomilov o`tgan yil dekabrda kredit olib, Arnasoyda birinchi bo`lib tomorqasida kichik gidroponika qurdi. Tomchilatib sug`orish orqali qulupnay etishtirdi. Daromad yaxshi bo`lganini ko`rgan qo`ni-qo`shnilar ham bunga qiziqib boshladi.
Bularning barchasi qishloq aholisiga oyog`i ostidagi xazina kalitini topib berishga xizmat qiladi. Tomorqasidan unumli foydalanib, qo`shimcha daromad topadigan inson esa hech qachon kambag`al bo`lmaydi.
