Zamonamizning eng mashhur fizigi Stiven Xoking Rimda kasalxonaga yotqizildi, deb xabar qildi “Vesti.ru” nashri.
74 yoshli yoshli olim Italiya poytaxtidagi Papa fanlar akademiyasiga konferensiyaga kelgan edi. Bu erda u Fransisk Rim Papasi bilan uchrashdi. Stiven Xoking 2 dekabr kuni kechasi kasalxonaga yotqizildi. Hozirda uning ahvoli bir muncha yaxshi.
Olim 22 yoshdaligida, 1963 yili unga “yonbosh amiotrofik sklerozi” tashxisi qo`yilgan. O`shanda vrachlar uni bor-yo`g`i 2-3 yil yashashini bashorat qilishgandi. Ammo fizika fanining mash`ali ularning bashoratini chippakka chiqardi. U nafaqat ilm-fan bilan mashg`ul bo`ldi, balki ikki marta uylanib, uch farzandning otasi bo`lishga ham ulgurdi.
Olim butunlay falaj bo`lib qolganiga qaramay, faol turmush tarzini kechiradi, kompyuter nutq sintezatori orqali dars o`tadi, nutq so`zlaydi, dunyo ahli bilan muloqotda bo`ladi. Stiven Xokingning “Vaqtning qisqacha ta`rifi” kitobi 10 million nusxada chop etilgan. U kvant kosmologiyasining asoschilaridan biri hisoblanadi, bundan tashqari bolalar uchun “Jorj va Koinot sirlari” nomli asarni ham yozgan.