Qashqadaryo viloyati Ko‘kdala tumanida iste’molga yaroqsiz go‘sht to‘xtatib qolindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Qayd etilishicha, Bosh prokuratura huzuridagi Departamentning Ko‘kdala tumani bo‘limi tomonidan YHXB xodimlari bilan hamkorlikda "Umakay" YPX maskanida tezkor tadbir o‘tkazilgan.
Tadbirda "Qarshi-Samarqand" yo‘nalishida harakatlanib kelayotgan "Cobalt" rusumli avtotransport vositasi to‘xtatib ko‘zdan kechirilganda fuqaro J.Ch. xavfsizlik talablariga javob bermaydigan qoramol go‘shtini o‘tkazish maqsadida olib ketayotgani aniqlanib, jami 400 kg. go‘sht ashyoviy dalil sifatida olingan.
Mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari o‘tkazilmoqda.