Soliq qo‘mitasi raisi Farrux Po‘latov Toshkentdagi ayrim umumiy ovqatlanish korxonalari qo‘shimcha qiymat solig‘ini to‘lamaslik uchun tushumlarni sun’iy ravishda bo‘lib yuborish sxemasidan foydalanayotganini ma’lum qildi.
Uning ta’kidlashicha, 400 dan ortiq restoran va kafe mijozlarga cheklarni o‘z korxonasi nomidan emas, balki yakka tartibdagi tadbirkorlar orqali bermoqda. Bu esa QQS to‘lamaslik uchun qo‘llanayotgan usul hisoblanadi.
Po‘latov tadbirkorlarni bunday amaliyotdan voz kechishga chaqirib, tekshiruvlardan so‘ng jiddiy jazo choralari qo‘llanilishi mumkinligini aytdi. “Agar kassa cheki berilmasa, bu tushumni yashirishga urinish hisoblanadi. Avvalo ogohlantirish beriladi, keyin esa katta jarimalar qo‘llaniladi”, — dedi u.
Muloqot davomida ishchilarning maoshini kamaytirib ko‘rsatish holatlari ham tanqid qilindi. Qayd etilishicha, ayrim tadbirkorlar xodimlarga to‘lanadigan ish haqqini sun’iy ravishda past ko‘rsatmoqda.
Davron Vahobov rahbarligidagi Savdo-sanoat palatasi ushbu tadbirkorlar bilan alohida ishlashga tayyor ekanini bildirgan. Aniqlangan korxonalar ro‘yxati palataga taqdim etilib, ular bilan tushuntirish ishlari olib borilishi rejalashtirilmoqda.
