Ulug‘ davlat arbobi, shoir va olim Zahiriddin Muhammad Bobur Qur’oni karimga va islomiy ilmlarga ulkan ehtirom bilan yondashgan. Uning ikki farmonida 50 dan ortiq oyati karimalar keltirilgan bo‘lib, bu buyuk shaxsning chuqur bilimli olim va ma’rifatli inson bo‘lganini ko‘rsatadi. Fors tilidagi bu farmonlar tarjima qilinib, O‘zbekistondagi Islom sivilizatsiyasi markazi va Bobur nomidagi xalqaro jamoat fondi ko‘magida chop etilgan 6 jildlik kulliyotdan o‘rin olgan.
Bobur Mirzo arab alifbosini soddalashtirgan va uni “Xatti Boburiy” deb nomlagan. Ushbu alifboda Qur’oni karimni ko‘chirtirib, uni Makkai mukarramaga yuborgan. Xatti Boburiyda yozilgan Qur’oni karimning qadimiy qo‘lzmasi hozirgi kunda Erondagi Mashhad muzeyida saqlanmoqda.
Bobur Mirzo ilmiy faoliyatini o‘rganishda yangi imkoniyatlarni ochadigan bu nodir nusxa O‘zbekistondagi Islom sivilizatsiyasi markazi muzeyi Qur’on bo‘limi ko‘rgazmasidan o‘rin olishi ko‘zda tutilgan.
