Janubiy Koreya prezidentiga davlat to‘ntarishi uyushtirish aybi qo‘yildi.
Janubiy Koreya prokuraturasi mamlakat prezidenti Yun Sok Yolni davlat to‘ntarishini tashkil etishda rasman aybladi. U, shuningdek, Milliy assambleya spikeri U Von Sikni va boshqa asosiy siyosiy arboblarni hibsga olishni rejalashtirganlikda ayblanmoqda.
Tergov ma’lumotlariga ko‘ra, Yun Sok Yol sobiq mudofaa vaziri Kim Yon Xyon va boshqalar bilan birgalikda 3 dekabrda qo‘zg‘olon uyushtirish uchun til biriktirgan. Bu maqsadda, qurolli to‘qnashuv yoki shunga o‘xshash milliy inqiroz alomatlari yo‘qligiga qaramay, noqonuniy holat e’lon qilish rejalashtirilgan. Bundan tashqari, prezidentning hamtovoqlari raqib partiyalar rahbarlari va saylov kuzatuvchilarini hibsga olishlari kerak edi.
Seul markaziy okrug sudi prokuraturaning hibs muddatini uzaytirish to‘g‘risidagi iltimosini ikki marta rad etgani sababli, prezidentni 27 yanvar, dushanba kuni ozod qilish kerak edi. Biroq, qo‘yilgan ayblov tufayli, Yun Sok Yol qamoqda qoladi. Agar u qo‘zg‘olonda aybdor deb topilsa, umrbod qamoq yoki o‘lim jazosiga hukm qilinishi mumkin.
Janubiy Koreya parlamenti 3 dekabrda joriy qilingan harbiy holat tufayli Yun Sok Yolni prezidentlik lavozimidan chetlatgan edi. Mamlakatning Korrupsiyaga qarshi tergovlar boshqarmasi davlat rahbarini hibsga olish uchun order berib, uni 15 yanvarda qo‘lga olgan. 23 yanvarda prezidentning qo‘zg‘olon ishi prokuraturaga topshirilgan.
