Жанубий Корея президентига давлат тўнтариши уюштириш айби қўйилди.
Жанубий Корея прокуратураси мамлакат президенти Юн Сок Ёлни давлат тўнтаришини ташкил этишда расман айблади. У, шунингдек, Миллий ассамблея спикери У Вон Сикни ва бошқа асосий сиёсий арбобларни ҳибсга олишни режалаштирганликда айбланмоқда.
Тергов маълумотларига кўра, Юн Сок Ёл собиқ мудофаа вазири Ким Ён Хён ва бошқалар билан биргаликда 3 декабрда қўзғолон уюштириш учун тил бириктирган. Бу мақсадда, қуролли тўқнашув ёки шунга ўхшаш миллий инқироз аломатлари йўқлигига қарамай, ноқонуний ҳолат эълон қилиш режалаштирилган. Бундан ташқари, президентнинг ҳамтовоқлари рақиб партиялар раҳбарлари ва сайлов кузатувчиларини ҳибсга олишлари керак эди.
Сеул марказий округ суди прокуратуранинг ҳибс муддатини узайтириш тўғрисидаги илтимосини икки марта рад этгани сабабли, президентни 27 январь, душанба куни озод қилиш керак эди. Бироқ, қўйилган айблов туфайли, Юн Сок Ёл қамоқда қолади. Агар у қўзғолонда айбдор деб топилса, умрбод қамоқ ёки ўлим жазосига ҳукм қилиниши мумкин.
Жанубий Корея парламенти 3 декабрда жорий қилинган ҳарбий ҳолат туфайли Юн Сок Ёлни президентлик лавозимидан четлатган эди. Мамлакатнинг Коррупцияга қарши терговлар бошқармаси давлат раҳбарини ҳибсга олиш учун ордер бериб, уни 15 январда қўлга олган. 23 январда президентнинг қўзғолон иши прокуратурага топширилган.
