Tramp Zelenskiyni diktator deb atab, uni yana keskin tanqid qildi.
"Nisbatan muvaffaqiyatli komik" Vladimir Zelenskiy AQSHni 350 milliard dollar sarflashga ishontirdi, hech qachon yutuqqa erishib bo‘lmaydigan va umuman boshlanmasligi kerak bo‘lgan urushga kirishga majbur qildi, deb yozdi AQSH prezidenti Truth Social ijtimoiy tarmog‘ida.
Donald Trampning ta’kidlashicha, AQSH Yevropaga qaraganda 200 milliard dollar ko‘proq mablag‘ sarflagan, Yevropa mablag‘lari kafolatlangan, ammo AQSH buning evaziga hech narsa olmaydi.
Bundan tashqari, Zelenskiyning o‘zi «biz unga yuborgan mablag‘ning yarmi yo‘qolganini» tan olgan, deb qo‘shimcha qildi Tramp.
AQSH prezidenti ukrain yetakchisini saylov o‘tkazishdan bosh tortganlikda aybladi. Shuningdek, u Zelenskiy Ukrainada juda past reytingga ega ekanini va «u yaxshi uddalay olgan yagona narsa – Jo Baydenni manipulyatsiya qilish» ekanini ta’kidladi.
«Saylovsiz diktator Zelenskiy tezda harakat qilishi kerak, aks holda uning mamlakati qolmaydi, — xulosa qildi Tramp. — Shu bilan birga, biz Rossiya bilan urushni to‘xtatish bo‘yicha muvaffaqiyatli muzokaralar olib bormoqdamiz, chunki barcha buni faqat Tramp va Tramp ma’muriyati amalga oshira olishini tan olishmoqda».
Oradan bir kun o‘tib, Tramp jurnalistlarga Zelenskiyning reyting darajasi 4% ekanini aytdi, bu esa mavjud ijtimoiy so‘rov natijalariga to‘g‘ri kelmaydi. Ukraina prezidenti buni «Rossiyadan kelayotgan dezinformatsiya» deb atadi. Zelenskiy Tramp «dezinformatsiya muhitida yashayapti» degan xulosaga keldi.
Kiyev Xalqaro Sotsiologiya institutining 4-9 fevral kunlari o‘tkazgan so‘roviga ko‘ra, ukrainaliklarning 57% Zelenskiyga ishonishini, 37% esa ishonmasligini bildirgan.
Zelenskiyning ma’lumotiga ko‘ra, Rossiyaning Ukrainaga qarshi urushi 320 milliard dollarga tushgan, shundan 200 milliardini AQSH va YEI to‘lagan. «Jami AQSH bugungi kungacha bizga taxminan 60 milliard berdi, va biz yana 31,5 milliard oldik», dedi Ukraina prezidenti chorshanba kuni.
Abdulloh Sayyid
