Трамп Зеленскийни диктатор деб атаб, уни яна кескин танқид қилди.
"Нисбатан муваффақиятли комик" Владимир Зеленский АҚШни 350 миллиард доллар сарфлашга ишонтирди, ҳеч қачон ютуққа эришиб бўлмайдиган ва умуман бошланмаслиги керак бўлган урушга киришга мажбур қилди, деб ёзди АҚШ президенти Truth Social ижтимоий тармоғида.
Дональд Трампнинг таъкидлашича, АҚШ Европага қараганда 200 миллиард доллар кўпроқ маблағ сарфлаган, Европа маблағлари кафолатланган, аммо АҚШ бунинг эвазига ҳеч нарса олмайди.
Бундан ташқари, Зеленскийнинг ўзи «биз унга юборган маблағнинг ярми йўқолганини» тан олган, деб қўшимча қилди Трамп.
АҚШ президенти украин етакчисини сайлов ўтказишдан бош тортганликда айблади. Шунингдек, у Зеленский Украинада жуда паст рейтингга эга эканини ва «у яхши уддалай олган ягона нарса – Жо Байденни манипуляция қилиш» эканини таъкидлади.
«Сайловсиз диктатор Зеленский тезда ҳаракат қилиши керак, акс ҳолда унинг мамлакати қолмайди, — хулоса қилди Трамп. — Шу билан бирга, биз Россия билан урушни тўхтатиш бўйича муваффақиятли музокаралар олиб бормоқдамиз, чунки барча буни фақат Трамп ва Трамп маъмурияти амалга ошира олишини тан олишмоқда».
Орадан бир кун ўтиб, Трамп журналистларга Зеленскийнинг рейтинг даражаси 4% эканини айтди, бу эса мавжуд ижтимоий сўров натижаларига тўғри келмайди. Украина президенти буни «Россиядан келаётган дезинформация» деб атади. Зеленский Трамп «дезинформация муҳитида яшаяпти» деган хулосага келди.
Киев Халқаро Социология институтининг 4-9 февраль кунлари ўтказган сўровига кўра, украиналикларнинг 57% Зеленскийга ишонишини, 37% эса ишонмаслигини билдирган.
Зеленскийнинг маълумотига кўра, Россиянинг Украинага қарши уруши 320 миллиард долларга тушган, шундан 200 миллиардини АҚШ ва ЕИ тўлаган. «Жами АҚШ бугунги кунгача бизга тахминан 60 миллиард берди, ва биз яна 31,5 миллиард олдик», деди Украина президенти чоршанба куни.
Абдуллоҳ Саййид
