Turkiyaning Milliy razvedka tashkiloti (MIT) 2013 yilda Xatay viloyatining Reyxanli tumanida sodir etilgan qonli terrorchilik hujumi tashkilotchilaridan biri bo‘lgan Temir Dukanchini qo‘lga oldi. Dukanchi Suriyadan Livanga qochishga uringan paytida ushlangan.
Xavfsizlik manbalariga ko‘ra, Dukanchi Suriyada yashiringan va 2013 yilda 53 kishining hayotiga zomin bo‘lgan Reyxanli hujumi uchun portlovchi moddalarni dengiz orqali Turkiyaga olib kirishda va ularni tashish uchun transport vositalarini ta’minlashda ishtirok etgan.
Ma’lumotlarga ko‘ra, Dukanchi Livanda o‘zining terrorchilik tarmog‘i a’zolarini yig‘ib, Turkiyaning xorijdagi diplomatik vakolatxonalariga hujum uyushtirishni rejalashtirgan va bu maqsadda soxta pasport olishga harakat qilgan.
Dukanchi Turkiya Ichki ishlar vazirligining terrorizmda qidirilayotgan shaxslar ro‘yxatida "oranj" toifada edi. U Suriya-Livan chegarasida o‘tkazilgan operatsiya davomida qo‘lga olinib, Turkiyaga olib kelindi.
Avvalroq, MIT 2018 yilda Yusuf Nazikni va 2025 yil yanvar oyida Muhammad Dib Koralini Suriyada o‘tkazilgan operatsiyalar davomida qo‘lga olgan edi. Ikkisi ham Reyxanli hujumi tashkilotchilari sifatida ayblangan.
2013 yil 11 may kuni Xatay viloyatining Reyxanli tumanida ikki alohida bomba hujumi natijasida 53 kishi halok bo‘lgan va ko‘plab fuqarolar jarohatlangan edi.
Abdulloh Sayyid
