Туркиянинг Миллий разведка ташкилоти (MIT) 2013 йилда Хатай вилоятининг Рейханли туманида содир этилган қонли террорчилик ҳужуми ташкилотчиларидан бири бўлган Темир Дуканчини қўлга олди. Дуканчи Суриядан Ливанга қочишга уринган пайтида ушланган.
Хавфсизлик манбаларига кўра, Дуканчи Сурияда яширинган ва 2013 йилда 53 кишининг ҳаётига зомин бўлган Рейханлы ҳужуми учун портловчи моддаларни денгиз орқали Туркияга олиб киришда ва уларни ташиш учун транспорт воситаларини таъминлашда иштирок этган.
Маълумотларга кўра, Дуканчи Ливанда ўзининг террорчилик тармоғи аъзоларини йиғиб, Туркиянинг хориждаги дипломатик ваколатхоналарига ҳужум уюштиришни режалаштирган ва бу мақсадда сохта паспорт олишга ҳаракат қилган.
Дуканчи Туркия Ички ишлар вазирлигининг терроризмда қидирилаётган шахслар рўйхатида "оранж" тоифада эди. У Сурия-Ливан чегарасида ўтказилган операция давомида қўлга олиниб, Туркияга олиб келинди.
Аввалроқ, MIT 2018 йилда Юсуф Назикни ва 2025 йил январь ойида Муҳаммад Диб Коралини Сурияда ўтказилган операциялар давомида қўлга олган эди. Иккиси ҳам Рейханлы ҳужуми ташкилотчилари сифатида айбланган.
2013 йил 11 май куни Хатай вилоятининг Рейханлы туманида икки алоҳида бомба ҳужуми натижасида 53 киши ҳалок бўлган ва кўплаб фуқаролар жароҳатланган эди.
Абдуллоҳ Саййид
