12 mart kuni Utair (Rossiya) aviakompaniyasining Samarqanddan Moskvaga (UT-810) uchgan Boeing 737 samolyoti dvigatelida yuz bergan nosozlik tufayli aeroportga qaytishga majbur bo‘lgan.
Qayd qilinishicha, samolyot balandlikka ko‘tarilayotganda chap dvigatelida pompaj yuz bergan. Uchuvchilar dvigatelning quvvatini oshirishga harakat qilgan, ammo yana bir pompaj sodir bo‘lgan. Shundan so‘ng, kema komandiri Samarqandga qaytishga qaror qilgan.
Bir nechta aylanma parvozni amalga oshirgach, samolyot qo‘nish og‘irligi me’yordan yuqori bo‘lsa-da, Samarqand aeroportiga xavfsiz qo‘ngan.
Ayni paytda mutaxassislar nosozlik sabablarini izlash va bartaraf etishga kirishgani ta’kidlanmoqda. «Rosaviatsiya» hodisa yuzasidan tekshiruv boshlagan.
