Markaziy bankning Bank nazorati qo‘mitasi tomonidan shu yilning fevral oyida 8 marta yig‘ilish o‘tkazilib, 43 ta masala ko‘rib chiqildi va tegishli qarorlar qabul qilindi. Bu haqda MB matbuot xizmati xabar bermoqda.
Ma’lum qilinishicha, kredit tashkilotlari ustaviga o‘zgartirish kiritishda sakkizta, yangi mikromoliya tashkilotlarini ro‘yxatga olishda uchta, kredit tashkilotlari ustav fondidagi ulushga egalik qilish uchun ruxsat berishda beshta, vakolatxona ochish uchun bitta, tijorat banklari kuzatuv kengashi va boshqaruvi a’zolari hamda muhim xodimlarning nomzodlarini ko‘rib chiqishda o‘n uchta masala muhokama qilindi.
Shuningdek, ta’sischilari tomonidan tugatilishi to‘g‘risida qaror qabul qilingan «Ishonch Plyus Hamkor» mikromoliya tashkiloti davlat reyestridan chiqarildi.
Bundan tashqari, banklarning moliyaviy holati bo‘yicha 12 ta masala muhokamasi o‘tkazilib, uchta bank iqtisodiy me’yorlar va qonunchilik talablariga rioya qilmagani uchun ogohlantirildi hamda beshta bankka o‘tkazilgan inspeksiya tekshiruvlari davomida aniqlangan qoidabuzarliklar sababli jarima sanksiyalari qo‘llanildi.
