Joriy yilning 30-mart kuni Rossiyaning Sankt Peterburg shahrida bir guruh erkaklar 21 yoshli o‘zbekistonlikni o‘g‘irlab ketib, uni qaytarish uchun 40 ming rubl (salkam 472 dollar) talab qildi. Bu haqda “78.ru” nashri ma’lum qildi.
Qayd etilishicha, hodisani peterburglik ayol politsiyaga qo‘ng‘iroq qilib, o‘g‘li odam o‘g‘irlashga guvoh bo‘lganini aytgan. Unga ko‘ra, Xalturin ko‘chasida 6-7 nafar erkak migrantni do‘pposlagan va avtomobilga o‘tkazgan. Jabrlanuvchining hamrohi ham mashinaga o‘tirgan. So‘ng ular ko‘zdan g‘oyib bo‘lgan.
Oradan bir necha soat vaqt o‘tgach o‘g‘irlangan o‘zbekistonlik yigitning akasi politsiyaga murojaat qilgan. U noma’lum shaxslar qo‘ng‘iroq qilib, ukasi ularning qo‘lida ekanini aytganini ma’lum qilgan. O‘g‘rilar 40 ming rubl talab qilgan.
O‘g‘rilikda gumon qilinib, 20 yoshdan 45 yoshgacha bo‘lgan olti kishi qo‘lga olingan, ularning barchasi xorijlik bo‘lib chiqqan. O‘g‘irlangan shaxs Stachek prospektidagi 9-uydan topilgan, u ba’zi gumonlanuvchilar bilan tanish bo‘lgan.
Yetti kishi, jumladan, jabrlanuvchi ham izolyatorga joylashtirilgan. O‘zbekiston fuqarosi migratsiya qoidabuzarliklari sodir etgani aytilmoqda.
“Holat yuzasidan jinoyat ishi qo‘zg‘atilgan. Ehtiyot chorasini tanlash masalasi hal qilinmoqda. Voqeaning barcha tafsilotlari aniqlanmoqda”, — deyiladi xabarda.
