Жорий йилнинг 30 март куни Россиянинг Санкт Петербург шаҳрида бир гуруҳ эркаклар 21 ёшли ўзбекистонликни ўғирлаб кетиб, уни қайтариш учун 40 минг рубл (салкам 472 доллар) талаб қилди. Бу ҳақда “78.ru” нашри маълум қилди.
Қайд этилишича, ҳодисани петербурглик аёл полицияга қўнғироқ қилиб, ўғли одам ўғирлашга гувоҳ бўлганини айтган. Унга кўра, Халтурин кўчасида 6-7 нафар эркак мигрантни дўппослаган ва автомобилга ўтказган. Жабрланувчининг ҳамроҳи ҳам машинага ўтирган. Сўнг улар кўздан ғойиб бўлган.
Орадан бир неча соат вақт ўтгач ўғирланган ўзбекистонлик йигитнинг акаси полицияга мурожаат қилган. У номаълум шахслар қўнғироқ қилиб, укаси уларнинг қўлида эканини айтганини маълум қилган. Ўғрилар 40 минг рубл талаб қилган.
Ўғриликда гумон қилиниб, 20 ёшдан 45 ёшгача бўлган олти киши қўлга олинган, уларнинг барчаси хорижлик бўлиб чиққан. Ўғирланган шахс Стачек проспектидаги 9-уйдан топилган, у баъзи гумонланувчилар билан таниш бўлган.
Етти киши, жумладан, жабрланувчи ҳам изоляторга жойлаштирилган. Ўзбекистон фуқароси миграция қоидабузарликлари содир этгани айтилмоқда.
“Ҳолат юзасидан жиноят иши қўзғатилган. Эҳтиёт чорасини танлаш масаласи ҳал қилинмоқда. Воқеанинг барча тафсилотлари аниқланмоқда”, — дейилади хабарда
