AQSH Prezidenti Donald Tramp butun dunyo bo‘ylab o‘nlab davlatlarga boj stavkalarini joriy qilmoqda, jumladan O‘zbekiston tovarlariga ham. Eng yuqori bojlar Xitoy, Vetnam va Kambodja mahsulotlariga qo‘llanildi. Bu haqda Trampning tegishli farmoyishi e’lon qilindi.
Donald Tramp AQSH iqtisodiyotda favqulodda holat e’lon qilib, shu orqali bojlarni belgilash bo‘yicha keng vakolatlarga ega bo‘lgan. AQSH Prezidentining farmonida aytilishicha, muvozanatsiz tarif stavkalari va ikki tomonlama savdo munosabatlaridagi o‘zaro tenglikning yo‘qligi, jumladan, AQSH savdo balansidagi kamomad, mamlakat milliy xavfsizligiga g‘ayrioddiy va favqulodda tahdid solmoqda.
Oq uy rahbariga ko‘ra, AQSH boshqa davlatlarning Amerika mahsulotlarga nisbatan qo‘llayotgan umumiy boj stavkalarini hisoblab chiqadi va shunga mos ravishda uning yarmiga teng stavkani o‘rnatadi.
Tramp ko‘rsatgan jadvalga ko‘ra:
- Yevropa Ittifoqi uchun boj stavkasi 20 foiz,
- Tayvan – 32 foiz;
- Yaponiya – 24 foiz;
- Janubiy Afrika – 30 foiz;
- Shveysariya – 31 foiz.
Birlashgan Qirollik, Misr, Turkiya, Kolumbiya, Peru, Argentina, Chili, Singapur va O‘zbekiston kabi davlatlar uchun minimal 10 foizlik asosiy boj belgilangan.
Shuningdek, AQSH Prezidenti boj stavkasini nolga tushirish usulini ham taklif qilmoqda – buning uchun mahsulot va tovarlarni AQSHda ishlab chiqarish kerak. Uning so‘zlariga ko‘ra, o‘zaro bojlar AQSH uchun “oltin davr”ni boshlab beradi va “ish o‘rinlari hamda fabrikalar shovqin bilan AQSHga qaytadi”.
Bundan tashqari, bugun, 3 apreldan boshlab AQSH yengil avtomobillar, yengil yuk mashinalari va avtoulov ehtiyot qismlari importiga ham 25 foiz boj joriy qiladi.
Donald Tramp hatto hech kim yashamaydigan Xerd va MakDonald orollariga ham 10 foizlik boj qo‘ydi. Ushbu orollarning aholisi 0 kishi, biroq u yerda pingvinlarning ulkan populyatsiyasi joylashgan. Dunyodagi eng olis quruqlik joylashgan hudud Hind okeanining janubiy qismida bo‘lib, Xerd va MakDonald orollaridan iborat. Ular Avstraliyaning tashqi hududlari hisoblanadi.
“Trampning Xitoyga nisbatan joriy etgan yangi boj stavkalari avvalgilarga qo‘shildi va natijada Xitoy importiga qo‘llaniladigan umumiy boj 54 foizga yetdi”, deb ma’lum qildi AQSH Moliya vaziri.
