O‘zbekistondagi ayrim oilaviy poliklinikalarda tibbiyot xodimlari 1 iyuldan faqat to‘liq stavkada ishlaydi. Bu haqda prezidentning 19 maydagi farmonida belgilandi.
Farmonga ko‘ra, 2025 yil 1 iyuldan quyidagi hududlarda tajriba-sinov tariqasida sog‘liqni saqlash tizimini tashkil etishning yangi modeli (tajriba-sinov loyihasi) joriy qilinadi:
- Qoraqalpog‘iston Respublikasi Chimboy tumani;
- Andijon viloyati Asaka tumani;
- Buxoro viloyati G‘ijduvon tumani;
- Jizzax viloyati G‘allaorol tumani;
- Qashqadaryo viloyati Kitob tumani;
- Navoiy viloyati Xatirchi tumani;
- Namangan viloyati Chortoq tumani;
- Samarqand viloyati Samarqand shahri hamda Bulung‘ur va Ishtixon tumanlari;
- Surxondaryo viloyati Denov tumani;
- Sirdaryo viloyati Sirdaryo tumani;
- Toshkent viloyati Yangiyo‘l shahri;
- Farg‘ona viloyati Quva tumani;
- Xorazm viloyati Shovot tumani.
2026 yil 1 yanvardan esa Samarqand viloyatining barcha tuman (shahar)larida ushbu tajriba-sinov loyihasi joriy qilinadi.
Tajriba-sinov loyihasi doirasida:
- oilaviy poliklinikalarda tibbiyot xodimlari faqat to‘liq stavkada faoliyat yuritadi;
- aholiga oilaviy shifokorni erkin tanlash huquqi beriladi.
- tuman (shahar) tibbiyot birlashmalari negizida tuman (shahar) sog‘liqni saqlash bo‘limlari tashkil etiladi;
- oilaviy poliklinikalarda aholiga tibbiy yordam ko‘rsatuvchi oilaviy shifokor, pediatr, akusher-ginekolog va tashxislash xizmatlarini ko‘rsatuvchi mutaxassislar, shuningdek, autsorsing asosida stomatologiya xizmati yo‘lga qo‘yiladi;
- oilaviy poliklinikadan 10 kilometrdan uzoq masofada joylashgan mahalla fuqarolar yig‘inlarida yashovchi aholi uchun tibbiyot xodimlarining sayyor tibbiy xizmati yo‘lga qo‘yiladi.
Shuningdek, aholiga tibbiy xizmatlar davlat budjeti mablag‘lari hisobidan qoplanadigan tibbiy yordamning kafolatlangan hajmlari doirasida oilaviy shifokor yoki tibbiyot brigadasining yo‘llanmasi asosida bepul ko‘rsatiladi (shoshilinch va tez tibbiy yordam ko‘rsatish bundan mustasno).
Kafolatlangan paketga kiritilmagan qo‘shimcha tibbiy yordam hamda oilaviy shifokor yoki tibbiyot brigadasi yo‘llanmasi mavjud bo‘lmasdan to‘g‘ridan to‘g‘ri murojaat qilingan fuqarolarga tibbiy yordam pullik asosda ko‘rsatiladi.
