Bugun 17:32

Toshkentda fuqarolarni AQSH va Yaponiyaga jo‘natishni va’da qilganlar qo‘lga tushdi

Ular AQSHga jo‘natishni 22,5 ming, Yaponiyaga jo‘natishni 2 ming dollarga “baholashgan”.

Toshkent shahrida fuqarolarni xorijiy davlatlarga yuborishni va’da qilgan shaxslar ushlandi, deya xabar qildi Bosh prokuratura huzuridagi Iqtisodiy jinoyatlarga qarshi kurashish departamenti.

Qayd etilishicha, Yunusobod tumanida fuqaro J.A. AQSHda yashovchi qarindoshi B.R. bilan o‘zaro til biriktirib, ikki kishini tanishlari yordamida Meksika va Yevropa davlatlari orqali Amerikaga borishi uchun viza olib berishini aytgan. Evaziga 22 500 dollar olgan vaqtida ashyoviy dalillar bilan ushlangan.

Bektemir tumanida esa S.N. fuqarolar M.A. va X.T.ning ishonchiga kirib, ularni tanishlari yordamida Yaponiya davlatiga ishga yuborishi evaziga 2000 dollarni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (Firibgarlik) va 28, 211-moddasi (Pora berish) bilan jinoyat ishlari qo‘zg‘atilib, tergov harakatlari o‘tkazilmoqda.