Qozog‘iston parlamenti Majlisi deputatlari senatorlarning jamoat joylarida yuzni berkituvchi kiyim kiyishni taqiqlashni nazarda tutuvchi qonunga kiritgan tuzatishlariga rozi bo‘ldi. Hujjat imzolash uchun davlat rahbariga yuborildi, deb yozadi “Zakon.kz”.
Senator Naurizbay Bayqadamov “Huquqbuzarliklar profilaktikasi to‘g‘risida”gi qonunga tibbiy maqsadlarda, ob-havo sharoitlaridan, xizmat yoki mehnat vazifalarini bajarishdan tashqari, jamoat joylarida yuzni tanib olishga to‘sqinlik qiluvchi kiyim kiyishni taqiqlovchi norma kiritilgani haqida ma’lum qildi. Uning so‘zlariga ko‘ra, bu chora, yuzni tanib olish qobiliyatini oshirish orqali jamoat joylarida huquqbuzarliklar profilaktikasi samaradorligini oshiradi.
Qozog‘istonda bir necha yildan buyon jamoat joylarida diniy libos kiyish muhokama qilinmoqda.
