Yunoniston kompaniyasiga tegishli MV Eternity C yuk kemasi Yaman sohillari yaqinida husitlar tomonidan hujumga uchrab, Qizil dengizda cho‘kib ketdi. Hodisa natijasida kamida to‘rt kishi halok bo‘ldi, yana bir necha kishi og‘ir tan jarohati oldi. Bu haqda “DW Glavnoe” va “Reuters” agentliklari xabar berdi.
Kema bortida 22 nafar dengizchi bo‘lgan: 21 nafari Filippin fuqarosi, yana biri boshqa davlatdan. AFP manbalariga ko‘ra, hujumdan so‘ng kamida besh kishi qutqarilgan, ikki kishi jarohat olgan, ulardan biri — Rossiyalik elektromexanik, u oyog‘idan ayrilgan.
Kema Hodeyda port shahri yaqinida cho‘kdi. Bu hudud ayni paytda husit isyonchilari nazorati ostida.
Husitlar 2023 yil oktyabridan beri Qizil dengizdagi savdo kemalariga muntazam hujum uyushtirib kelmoqda. Bu harakatlar Isroilning G‘azo sektoriga zarbalarini to‘xtatishga majburlash uchun qilinmoqda.
Husitlar hujumining navbatdagi qurboni — yunon kemasi va uning begunoh ekipaji bo‘ldi. Bu Qizil dengizdagi xavfsizlik inqirozining jiddiylashib borayotganidan dalolat beradi.
