Moskva — Rossiya Federatsiyasi Mudofaa vazirligi mamlakatdagi yagona aviatsion kreyser — “Admiral Kuznetsov”ni ta’mirdan chiqarish ishlarini to‘xtatib, uni butunlay xizmatdan chiqarish masalasini ko‘rib chiqmoqda. Bu haqda “Izvestiya” nashri ma’lum qildi.
Qayd etilishicha, 1985 yilda suvga tushirilgan mazkur kreyser 2017 yildan beri modernizatsiya qilinayotgan edi. Ammo so‘nggi yillarda yuz bergan texnik muammolar, xususan, Rossiyadagi eng yirik suzuvchi dokning cho‘kishi hamda kemaning o‘zida sodir bo‘lgan yong‘in natijasida ta’mirlash ishlari sezilarli darajada murakkablashdi.
Rossiya Tinch okeani floti sobiq qo‘mondoni, admiral Sergey Avakyants ushbu turdagi kema texnologiyasi o‘z dolzarbligini yo‘qotganini bildirar ekan, shunday deydi:
“Bu juda qimmat va samarasiz dengiz qurolidir. Kelajak — robotlashtirilgan komplekslar va uchuvchisiz aviatsiya tizimlariga tegishlidir.”
Mazkur fikrga Strategik rejalashtirish tadqiqot markazi eksperti Il’ya Kramnik ham qo‘shildi. Unga ko‘ra, Rossiya harbiy-dengiz salohiyatini mustahkamlash uchun “yangi avlod palubali qiruvchi samolyotlarga asoslangan kemalar” qurilishi maqsadga muvofiq bo‘ladi.
“Admiral Kuznetsov” bugungi kunga qadar Rossiya Harbiy-dengiz flotining yagona aviatsion kreyseri bo‘lib, mamlakat harbiy-dengiz doktrinasida alohida o‘rin tutgan. Uni xizmatdan chiqarish Rossiyaning uzoq masofali dengiz amaliyotlaridagi imkoniyatlarini qayta ko‘rib chiqishga olib kelishi mumkin.
