15 iyul kuni kechki payt Xarkov shahri Rossiya harbiylarining navbatdagi hujumiga uchradi. Mahalliy hokimiyat ma’lumotiga ko‘ra, shaharga atigi 20 daqiqa ichida kamida 17 ta portlash sodir bo‘lgan.
Xarkov viloyat harbiy ma’muriyati rahbari Oleg Sinegubovning so‘zlariga ko‘ra, zarbalar “Shahed” turidagi hujumkor dronlar orqali amalga oshirilgan. Ularning aksariyati Kiyev tumanida joylashgan fuqarolik sanoat korxonasiga qaratilgan.
Hujum oqibatida yong‘in kelib chiqqan. Rasmiylarning dastlabki bayonotiga ko‘ra, hodisa natijasida jarohat olganlar yo‘q.
Ukrainadagi monitoring guruhlari ma’lumotiga ko‘ra, ayni shu kuni kechqurun Rossiya tomonidan mamlakat bo‘ylab o‘nlab dronlar yordamida hujumlar uyushtirilgan.
