2024 yil fevral oyida 7,5 yil ozodlikdan mahrum etish jazosiga hukm qilingan “Toshshahartransxizmat” aksiyadorlik jamiyatining sobiq rahbari Anvar Jo‘rayev 2025 yil iyun oyida qamoqdan ozod etildi.
Toshkent shahar sudi apellyatsiya instansiyasining jinoyat ishlari bo‘yicha sudlov hay’ati 5 iyun kuni chiqargan qarorga ko‘ra, unga nisbatan ozodlikdan mahrum qilish jazosi ozodlikni cheklash jazosiga almashtirildi. Ya’ni, Jo‘rayev 4,5 yil davomida muayyan cheklovlar bilan erkinlikda yashash huquqini oldi.
Bundan tashqari, u 3 yil mobaynida “Toshshahartransxizmat” tizimida moddiy javobgarlik yoki boshqaruv vazifalarida ishlash huquqidan mahrum qilindi.
Eslatib o‘tamiz, Anvar Jo‘rayevga nisbatan juda ko‘p miqdorda talon-toroj qilish, soliq to‘lashdan bo‘yin tovlash, mansab vakolatini suiiste’mol qilish, mansab soxtakorligi va jinoiy daromadlarni legallashtirish kabi ayblovlar qo‘yilgan edi.
Sud hukmida qayd etilishicha, u davlatga katta miqdorda moddiy zarar yetkazgan. Shu bilan birga, ozodlikka chiqishi sabablari va sud qarorining motivatsiyasi ochiqlanmagan.
