Qurol savdosi AQShning tashqi siyosati va ittifoqchilar xavfsizligini mustahkamlashga xizmat qilishi aytilmoqda.
AQSh Davlat departamenti Ukrainaqa 825 million dollarlik qurol sotish bitimini maʼqulladi. Mudofaa xavfsizligi boʻyicha hamkorlik agentligi (DSCA) bayonotiga koʻra, shartnomaga havoda etkazib beriladigan oʻq-dorilar, 3350 ta ERAM uzoq masofali raketalar, GPS tizimlari, raketa konteynerlari, ehtiyot qismlar, dasturiy taʼminot va texnik hujjatlar kiradi.
Bitim boʻyicha AQSh Kongressiga rasmiy bildirishnoma yuborilgan. Qayd etilishicha, qurol savdosi “mintaqadagi asosiy harbiy muvozanatni oʻzgartirmaydi”, biroq AQShning tashqi siyosiy va milliy manfaatlariga xizmat qiladi.
Ukraina mazkur qurollarni tashqi harbiy moliyalashtirish (FMF) dasturi doirasida Daniya, Niderlandiya va Norvegiya moliyaviy koʻmagida xarid qilmoqda.
Eslatib oʻtamiz, 18 avgust kuni Ukraina Prezidenti Vladimir Zelenskiy AQShdan urushdan keyingi davrda jami 90 milliard dollarlik harbiy texnika sotib olish niyatida ekanini bildirgan edi.
