Қурол савдоси АҚШнинг ташқи сиёсати ва иттифоқчилар хавфсизлигини мустаҳкамлашга хизмат қилиши айтилмоқда.
АҚШ Давлат департаменти Украинага 825 миллион долларлик қурол сотиш битимини маъқуллади. Мудофаа хавфсизлиги бўйича ҳамкорлик агентлиги (ДСCА) баёнотига кўра, шартномага ҳаводан етказиб бериладиган ўқ-дорилар, 3350 та ERAM узоқ масофали ракеталар, GPS тизимлари, ракета контейнерлари, эҳтиёт қисмлар, дастурий таъминот ва техник ҳужжатлар киради.
Битим бўйича АҚШ Конгрессига расмий билдиришнома юборилган. Қайд этилишича, қурол савдоси “минтақадаги асосий ҳарбий мувозанатни ўзгартирмайди”, бироқ АҚШнинг ташқи сиёсий ва миллий манфаатларига хизмат қилади.
Украина мазкур қуролларни ташқи ҳарбий молиялаштириш (ФМФ) дастури доирасида Дания, Нидерландия ва Норвегия молиявий кўмагида харид қилмоқда.
Эслатиб ўтамиз, 18 август куни Украина Президенти Владимир Зеленский АҚШдан урушдан кейинги даврда жами 90 миллиард долларлик ҳарбий техника сотиб олиш ниятида эканини билдирган эди.
