Россиянинг Камчатка ўлкасида муҳожирларга қалбаки ҳужжатлар тайёрлаб бериш билан шуғулланган Ўзбекистон фуқароси 1 йил 2 ойга озодликдан маҳрум этилди.
Петропавловск-Камчатский шаҳар суди Ўзбекистон фуқаросига Камчаткада муҳожирларнинг ноқонуний қолишини ташкил этганлик ҳақидаги жиноят иши бўйича айблов ҳукмини эълон қилди. Суд маълумотларига кўра, Россия жиноят кодексининг 322−1-моддаси 1 ва 2-қисмлари (Олдиндан тил бириктирган гуруҳ томонидан Россияда хорижий фуқароларнинг ноқонуний қолишини ташкил этиш) бўйича унга умумий тартибдаги колонияда ўташ шарти билан 1 йил 2 ойга озодликдан маҳрум этиш жазоси тайинланган. Ҳукм ҳали қонуний кучга кирмаган.
Ўзбекистон фуқароси аввалроқ Россия Федерал хавфсизлик хизмати томонидан Москвада қўлга олинган, сўнг Камчаткага юборилган. Бу ерда уни ҳибсга олишган.
Ўзбекистонлик Камчаткада шериги билан паспортларга Россия давлат чегарасидан ўтганлик ҳақида сохта муҳр ва сана қўйган, шунингдек, миграция карталарини сохталаштирган. Бу ҳужжатлар муҳожирларга мамлакат ҳудудида белгиланган муддатдан кўпроқ вақт ноқонуний қолиш имконини берган.
Ҳибсга олинган шахс яшаган уйдан хорижий фуқароларни қонунийлаштириш учун мўлжалланган ҳужжатлар бланкалари топилган.
Унинг шериги аввалроқ Россия Жиноят кодексининг 322−1-моддаси 2-қисми бўйича судланган эди. Шаҳар суди уни кейинчалик мамлакатдан чиқариб юбориш шарти билан 1 йилга озодликдан маҳрум этган. Хабарда унинг қайси мамлакат фуқароси экани очиқланмаган.
