Bu haqda 6 yanvar kuni Parijda bo‘lib o‘tgan “Ko‘ngillilar koalitsiyasi” sammitida Frantsiya Prezidenti Emmanuil Makron, Buyuk Britaniya Bosh vaziri Kir Starmer va Ukraina Prezidenti Vladimir Zelenskiy imzoladi.
Deklaratsiyada besh asosiy yo‘nalish ko‘zda tutilgan:
- AQSh o‘t ochishni to‘xtatish rejimini nazorat qiladi va qoida buzilish holatlari uchun maxsus komissiya tuziladi;
- Ko‘ngillilar koalitsiyasi a’zolari Ukraina Qurolli kuchlarini moliyaviy va harbiy jihatdan qo‘llab-quvvatlaydi;
- Ukraina hududida ko‘p millatli kuchlar joylashtiriladi;
- Rossiya yangi hujum qilsa, qo‘llab-quvvatlash bo‘yicha huquqiy majburiyatlar ishlab chiqiladi;
- uzoq muddatli harbiy hamkorlik rivojlantiriladi.
Frantsiya, Buyuk Britaniya va Ukraina uch tomonlama deklaratsiya imzolab, urush to‘xtatilgach Ukraina hududida qo‘shin yuborishga tayyor ekanini e’lon qildi. Shu bilan birga, Rossiya bunday harbiy qo‘shinlarni xavfsizlikka tahdid deb bilishini bir necha bor bildirgan.
Zelenskiy esa 29 dekabrda AQShdan Ukraina uchun 30–50 yillik xavfsizlik kafolatlari so‘ragan edi; hozir tomonlar 15 yillik kafolat variantini muhokama qilmoqda.
