Bugun, 21 aprel kuni Shavkat Mirziyoev rasmiy tashrif bilan mamlakatda bo‘lib turgan Tedros Adhanom Ghebreyesusni qabul qildi. Uchrashuvda Jahon sog‘liqni saqlash tashkiloti bilan milliy sog‘liqni saqlash tizimini modernizatsiya qilish va mustahkamlash bo‘yicha hamkorlikni rivojlantirish masalalari ko‘rib chiqildi.
Qayd etilishicha, so‘nggi yillarda tashkilot bilan hamkorlik yangi bosqichga ko‘tarilib, tibbiyot tizimida keng ko‘lamli islohotlar xalqaro standart va tavsiyalar asosida amalga oshirilmoqda. Malakali kadrlar tayyorlash, birinchi tibbiy yordam, diagnostika va profilaktika tizimini takomillashtirish, davlat tibbiy sug‘urtasini joriy etish ishlari shular jumlasidan.
JSST rahbari O‘zbekistonda tibbiyot xizmatlaridan foydalanish imkoniyatlari kengaygani, umr ko‘rish davomiyligi oshgani, onalar o‘limi kamaygani hamda raqamli tibbiyot rivojlanayotganini alohida e‘tirof etdi. Tomonlar farmatsevtika sohasini tartibga solish, raqamli yechimlar va sun’iy intellektni joriy etish bo‘yicha amaliy hamkorlikni kengaytirishga kelishib oldi.
